రాజస్థాన్ రాజకీయాలు రోజుకో మలుపు తిరుగుతున్నాయి. తిరుగుబాటు నేత సచిన్ పైలట్ వర్గం ఎమ్మెల్యేలపై ఈనెల 24 వరకు ఎలాంటి చర్యలు తీసుకోవద్దని రాష్ట్ర హైకోర్టు తీర్పు వెలువరించింది. ఈ తీర్పుపై అసంతృప్తి వ్యక్తం చేశారు రాష్ట్ర స్పీకర్ సీపీ జోషి. హైకోర్టు ఆదేశాలపై సుప్రీం కోర్టులో స్పెషల్ లీవ్ పిటిషన్(ఎస్ఎల్పీ) దాఖలు చేశారు. రాష్ట్రంలో నెలకొన్న రాజ్యాంగ సంక్షోభాన్ని నిలువరించేందుకే ఈ నిర్ణయం తీసుకున్నట్లు చెప్పారు.
"షోకాజ్ నోటీసులు పంపే పూర్తి అధికారం స్పీకర్కు ఉంది. సుప్రీం కోర్టులో పిటిషన్ దాఖలు చేయమని మా న్యాయవాదిని కోరాను. స్పీకర్ బాధ్యతలు సుప్రీం కోర్టు, రాజ్యాంగం స్పష్టంగా నిర్వచించాయి. స్పీకర్గా నాకు ఓ దరఖాస్తు వచ్చింది. దానిపై సమాచారం తెలుసుకోవాలనుకునే షోకాజ్ నోటీసులు జారీ చేశాను. ఉన్న అధికారంతో నోటీసులు ఇవ్వకపోతే.. ఇకా ఆ అధికారం ఎందుకు?"
- సీపీ జోషి, రాజస్థాన్ అసెంబ్లీ స్పీకర్
నోటీసులు ఇవ్వటం అనేది స్పీకర్ బాధ్యత అని.. తీర్పుపై ఆధారపడాల్సింన అవసరం లేదన్నారు జోషి. ఇది కేవలం షోకాజ్ నోటీసేనని.. ఇంకా ఏ నిర్ణయం తీసుకోలేదని స్పష్టం చేశారు. ఫిరాయింపుల నిరోధక చట్టం అనుసరించి స్పీకర్ తీసుకున్న నిర్ణయాన్ని మారుస్తూ 1992 నుంచి ఏ కోర్టు తీర్పు వెలువరించలేదని గుర్తు చేశారు. పార్లమెంటరీ ప్రజాస్వామ్యంలో రాజ్యాంగ పదవుల అధికారాలు స్పష్టంగా నిర్వచించారని.. ఎన్నికైన వారు ఆ పదవిని చేపడతారని పేర్కొన్నారు.
విప్‌ ధిక్కరించి శాసనసభాపక్ష సమావేశానికి గైర్హాజరైన పైలట్ సహా 19మంది ఎమ్మెల్యేలపై అనర్హత వేటు వేయాలని కాంగ్రెస్ ఫిర్యాదు చేయగా స్పీకర్ నోటీసులు జారీ చేశారు స్పీకర్ జోషి.
హైకోర్టు ఆదేశాలు..
స్పీకర్ నోటీసులను సవాల్ చేస్తూ సచిన్ పైలట్ వర్గం దాఖలు చేసిన పిటిషన్పై మంగళవారం(జులై 21న) విచారణ జరిపి.. తీర్పును శుక్రవారానికి వాయిదా వేసింది. అనర్హత వేటుపై ఈ నెల 24 వరకు ఎలాంటి చర్యలు తీసుకోవద్దని ఆదేశించింది.
ఇదీ చూడండి: సచిన్ పైలట్ వర్గానికి హైకోర్టులో ఊరట
