వందకు పైగా చిన్నారులను బలిగొని తల్లిదండ్రులకు కడుపుకోత మిగిల్చిన రాజస్థాన్ కోటాలోని జేకే ఆసుపత్రి నిర్లక్ష్యం సంగతి తేలకముందే.. పక్క జిల్లా బూందీలోని మరో ప్రభుత్వాసుపత్రి వైనం బయటపడింది. డిసెంబర్లోనే ఈ ఆసుపత్రిలో 10 శిశు మరణాలు సంభవించినట్లు తెలుస్తోంది.
ఇదీ చూడండి: ఆగని 'కోటా' మరణాలు.. సమస్యకు పరిష్కారమేది!
ఈ మరణాల్లో వైద్యుల నిర్లక్ష్యం ఏమాత్రం లేదని ఆసుపత్రి వర్గాలు తెలిపాయి. ఆసుపత్రిలో చేరక ముందే చిన్నారుల పరిస్థితి విషమంగా ఉందనీ, తమ వైద్యంలో లోపంలేదని అంటున్నారు వైద్యులు.
"డిసెంబర్ నెలలో... పది మంది పిల్లలు మరణించారు. వారంతా వేర్వేరు వ్యాధుల వల్ల చనిపోయారు. ఆసుపత్రికి తీసుకొచ్చే ముందే వారి పరిస్థితి విషమంగా ఉంది. అందుకే ఈ మరణాలు సంభవించాయి. వీరిలో కొందరు బయటి ఆసుపత్రుల సూచన మేరకు ఈ ఆసుపత్రికి తీసుకువచ్చారు. వీరిలో కొందరు తక్కువ బరువు, శ్వాస కోశ వ్యాధులు, మురికి నీరు తాగడం వల్ల మృతి చెందారు. "
- హితేష్ సోనీ, ఆసుపత్రి ఇన్ఛార్జి
విషయం తెలియగానే జిల్లా అదనపు పాలనాధికారి ఆసుపత్రిని సందర్శించారు. ఆసుపత్రి సిబ్బంది నుంచి నివేదిక స్వీకరించి.. మరోసారి ఇలాంటి ఘటనలు జరగకుండా చర్యలు తీసుకోవాలని ఆదేశించారు.
ఇదీ చదవండి: మనసున్న 'మీరా'లక్ష్మి .. పేదలకు రూ.300 కోట్ల ఆస్తి దానం!
