కాంగ్రెస్ నేత రాహుల్గాంధీ నేడు ఉత్తరప్రదేశ్లోని అమేఠీలో పర్యటించనున్నారు. సార్వత్రిక ఎన్నికల్లో భాజపా నేత స్మృతి ఇరానీ చేతిలో ఓడిపోయిన తరువాత... ఆ నియోజకవర్గంలో రాహుల్ పర్యటించడం ఇదే తొలిసారి.
కాంగ్రెస్ కంచుకోట అయిన అమేఠీలో... తాను ఓడిపోవడానికి గల కారణాలు తెలుసుకోవడానికే రాహుల్ ఈ పర్యటన చేపట్టినట్లు ఆ పార్టీ వర్గాలు తెలిపాయి.
ఈ పర్యటనలో ఆయన పార్టీ ప్రతినిధులతో భేటీ అవుతారు. అలాగే సలోన్, అమేఠీ, గౌరీగంజ్, జగ్దీశ్పూర్, తలోయ్ అసెంబ్లీ విభాగాల అధ్యక్షులతోనూ సమావేశమవుతారు. పనిలో పనిగా రాహుల్ గాంధీ కొన్ని గ్రామాలనూ సందర్శిస్తారని ఆ పార్టీ జిల్లా అధికార ప్రతినిధి అనిల్ సింగ్ తెలిపారు.
అలాగే పార్టీ కార్యకర్తలతో రాహుల్గాంధీ.... గౌరీగంజ్లోని నిర్మలాదేవి ఎడ్యుకేషనల్ ఇన్స్టిట్యూట్లో సమావేశం కానున్నారు.
ఇదీ విషయం..
సార్వత్రిక ఎన్నికల్లో అమేఠీ నియోజకవర్గం నుంచి ఎంపీ అభ్యర్థిగా పోటీ చేసిన రాహుల్ గాంధీ భాజపా అభ్యర్థి స్మృతి ఇరానీ చేతిలో 52 వేల ఓట్ల తేడాతో ఓడిపోయారు. ఈ ఓటమికి నైతిక బాధ్యత వహిస్తూ రాహుల్ అధికార ప్రతినిధి చంద్రకాంత్ దూబే, జిల్లా అధ్యక్షుడు యోగేంద్ర మిశ్రా తమ పదవులకు రాజీనామా చేశారు. ఈ నేపథ్యంలో అమేఠీలో మరలా పార్టీని బలోపేతం చేయడంపై రాహుల్ దృష్టి సారించారు.
రాహుల్గాంధీ అమేఠీ లోక్సభ స్థానం నుంచి 1999 నుంచి ప్రాతినిధ్యం వహిస్తున్నారు. ప్రస్తుతం ఆయన కేరళలోని వయనాడ్ నుంచి పార్లమెంట్ సభ్యుడిగా ఉన్నారు.
ఇదీ చూడండి: 'రుణమాఫీ తర్వాతే రైతు ఆత్మహత్యలు పెరిగాయి'
