ప్రధానమంత్రి నరేంద్రమోదీపై విమర్శల వర్షం కురిపించారు కాంగ్రెస్ పార్టీ అధ్యక్షుడు రాహుల్గాంధీ. కిసాన్ సమ్మాన్ నిధిలో భాగంగా రోజుకు రూ.3.5 ఇస్తూ రైతులను చులకన చేస్తున్నారని ఆరోపించారు. చత్తీస్గఢ్లో గిరిజనులు అధికంగా ఉండే కోరాపుట్ జిల్లాలో ర్యాలీలో పాల్గొన్నారు రాహుల్. రుణమాఫీ హామీపై మరోసారి స్పష్టతనిచ్చారు.
నరేంద్ర మోదీ 15 మంది పారిశ్రామికవేత్తలకు చెందిన 3 లక్షల కోట్ల రుణాన్ని మాఫీ చేశారు. వాళ్లంతా దేశంలో ధనికులు. రైతుల రుణమాఫీకి డిమాండ్ చేస్తే... నరేంద్రమోదీ, నవీన్ పట్నాయక్ తిరస్కరించారు. కాంగ్రెస్ పార్టీ అధికారంలోకి వచ్చాక 10 రోజుల్లో ప్రతి రైతు రుణం మాఫీ చేస్తాం.
-రాహుల్గాంధీ, కాంగ్రెస్ అధ్యక్షుడు
ప్రధానమంత్రి స్వయంగా రఫేల్ ఒప్పందాన్ని తయారుచేసి, సమాంతరంగా చర్చలు జరిపారని దినపత్రికల్లో వచ్చిందన్నారు రాహుల్. అనిల్ అంబానీకి కాంట్రాక్టు ఇవ్వాలని మోదీ ఫ్రాన్స్ను డిమాండ్ చేశారని ఆరోపించారు.
ప్రధానమంత్రి ఒకవైపు దేశభక్తి గురించి మాట్లాడుతారు. రెండోవైపు వాయుసేన నుంచి డబ్బులు తీసుకొని తన మిత్రుడు అనిల్ అంబానీకి ఇచ్చారు. యూపీఏ ప్రభుత్వం రఫేల్ విమానాలను హెచ్ఏఎల్ తయారుచేయాలని నిర్ణయం తీసుకుంది. ఒక విమానాన్ని 526 కోట్లకు కొనటానికి నిర్ణయించాం. కాపాలాదారు అదే విమానం ధరను రూ.1600 కోట్లకు పెంచారు. అనిల్ అంబానీకి 30 వేల కోట్లను ఇవ్వటానికే ఈ పెంపుదల. - రాహుల్ గాంధీ, కాంగ్రెస్ అధ్యక్షుడు
నవీన్ పట్నాయక్ ప్రభుత్వంపైనా విమర్శలు చేశారు రాహుల్. రాష్ట్ర ప్రభుత్వం నాలుగైదుగురు అధికారుల చేతుల్లో ఉందని ఆరోపించారు. రాష్ట్రంలో అధికారంలోకి వస్తే పేద యువతుల పెళ్లికి సహాయం, రూ. 2000 వితంతు పింఛన్లు లాంటి పథకాలు తెస్తామని ప్రకటించారు.
ఇదీ చూడండి: 'ఎస్పీ ప్రభుత్వం వల్లే'
