కేంద్రం తీసుకొచ్చిన వ్యవసాయ చట్టాలకు వ్యతిరేకంగా.. పంజాబ్ శాసనసభలో తీర్మానాన్ని ప్రవేశపెట్టారు ముఖ్యమంత్రి అమరీందర్ సింగ్. దీనికి తోడు మూడు చట్టాలకు కౌంటర్గా మూడు బిల్లులను ప్రవేశపెట్టారు.
ప్రత్యేక అసెంబ్లీ సెషన్లో భాగంగా రెండో రోజు ఈ బిల్లులను ప్రవేశపెట్టారు అమరీందర్ సింగ్. ఫలితంగా వ్యవసాయ చట్టాలకు వ్యతిరేకంగా బిల్లులు తీసుకొచ్చిన తొలి రాష్ట్రంగా పంజాబ్ నిలిచింది.
ఈ నేపథ్యంలో కేంద్రంపై మండిపడ్డారు పంజాబ్ ముఖ్యమంత్రి. కేంద్ర ప్రభుత్వం వైఖరి వింతగా ఉందన్నారు. వ్యవసాయం అనేది రాష్ట్రాలకు సంబంధించిన వ్యవహారమన్న విషయాన్ని కేంద్రం విస్మరించిందని ఆరోపించారు.
వర్షాకాల సమావేశాల్లో భాగంగా.. గత నెలలో మూడు వ్యవసాయ బిల్లులను పార్లమెంట్ ఆమోదించింది. అనంతరం రాష్ట్రపతి ఆమోదంతో ఇవి చట్టాలుగా మారాయి. చట్టాలకు వ్యతిరేకంగా దేశవ్యాప్తంగా నిరసనలు చెలరేగాయి. రైతులకు ప్రధాని మోదీ ప్రభుత్వం ద్రోహం చేస్తోందని విపక్షాలు మండిపడ్డాయి.
ఇదీ చూడండి:- అసెంబ్లీలోనే నిద్రించి ఆప్ ఎమ్మెల్యేల నిరసన
