పంజాబ్లోని గురుదాస్పుర్ జిల్లా బతాలా నగరంలో భయానక అగ్నిప్రమాదం సంభవించింది. స్థానిక బాణసంచా కర్మాగారంలో పేలుడు ధాటికి 23 మంది మృతిచెందారు. 27 మంది తీవ్ర గాయాలపాలయ్యారు. శిథిలాల కింద మరి కొంతమంది చిక్కుకున్నట్లు అధికారులు భావిస్తున్నారు.
జాతీయ విపత్తు నిర్వహణ బృందం (ఎన్డీఆర్ఎఫ్)తో పాటు రాష్ట్ర విపత్తు నిర్వహణ బృందం(ఎస్డీఆర్ఎఫ్) ప్రమాదంలో చిక్కుకున్న వారికోసం సహాయక చర్యలు కొనసాగిస్తున్నాయి. సాయంత్రం 4 గంటల సమయంలో ఈ ప్రమాదం జరిగింది.
ఈ ఘటనలో చనిపోయిన వారంతా కార్మికులేనని అధికారులు తెలిపారు. రేపు జరిగే గురునానక్‌దేవ్‌ వివాహ మహోత్సవం కోసం బాణసంచా తయారు చేస్తుండగా ప్రమాదం జరిగినట్లు సమాచారం.
ముఖ్యమంత్రి విచారం
ఈ దుర్ఘటనపై పంజాబ్ ముఖ్యమంత్రి కెప్టెన్‌ అమరీందర్‌సింగ్‌ తీవ్ర విచారం వ్యక్తం చేశారు. సహాయక చర్యలను డిప్యూటీ కమిషనర్, ఎస్ఎస్పీ పర్యవేక్షిస్తున్నట్లు ట్వీట్‌ చేశారు.
తునాతునకలైన భవనం..ఎగిరిపడ్డ వాహనాలు
బాణసంచా కర్మాగారంలో పేలుడు ధాటికి ఆ భవనం తునాతునకలయ్యింది. భారీ శబ్దాలకు స్థానికులు బెంబేలెత్తిపోయారు. సమీపంలోని కార్లు ఎగిరిపడ్డాయి.
ప్రమాదంలో గాయపడిన వారి ఆర్తనాదాలకు స్థానికులు చలించిపోయారు. తీవ్రగాయాలపాలైన వారిని ఆస్పత్రికి తరలించేందుకు సహకరించారు.
- ఇదీ చూడండి: తాగుబోతు ఆటోవాలాకు రూ.48వేలు ఫైన్
