పప్పూ యాదవ్ బిహార్ రాజకీయాల్లో సుపరిచిత నేత. గతంలో 5 సార్లు ఎంపీగా.. ఒకసారి ఎమ్మెల్యేగా పని చేశారు ఈ ఆర్జేడీ మాజీ నాయకుడు. ప్రస్తుతం 2020 ఎన్నికలకు సొంతంగా జన్ అధికార్ పార్టీ పేరుతో ముందుకొచ్చారు. భావసారుప్యత కలిగిన 9 పార్టీలతో జట్టుకట్టి బిహారీ ఓటర్లను ఆకట్టుకునేందుకు ప్రయత్నిస్తున్నారు. మరి ఈ బిహార్ మాస్ నేత, రాబిన్ హుడ్గా పేరుగాంచిన నాయకుడు.. ఊహించని, ఊహకందని మిస్సైల్గా అభివర్ణించుకుంటున్న పప్పూ యాదవ్ ప్రభావం బిహార్ రాజకీయాలపై ఎంత వరకు ఉండనుంది ?
అనతికాలంలోనే..
ఉన్నతమైన కుటుంబం నుంచి రాజకీయాల్లోకి అడుగుపెట్టిన పప్పూ యాదవ్.. అనతికాలంలోనే బిహార్లో కీలక నేతగా ఎదిగారు. దిల్లీలో ఉన్నత విద్య అభ్యసించిన ఆయన అసలు పేరు రాజేశ్ రాజన్.
పేదలకు సాయం చేసే స్వభావం ఉన్న పప్పూ యాదవ్.. కోసీ ప్రాంతం గొంతుకగా మారారు. 1990లోనే పప్పూయాదవ్, స్వతంత్ర అభ్యర్థిగా పోటీ చేసి సింఘేసర్థ్సాన్ శాసనసభ్యుడిగా ఎన్నికయ్యారు. అనంతరం పుర్ణియా లోకసభ స్థానానికి 1991, 96, 99లో వరసగా 3సార్లు ఎంపీగా ఎన్నికయ్యారు. తర్వాత ఆర్జేడీ టికెట్ దక్కించుకుని 2004, 2014లో విజయం సాధించారు.
గ్రామీణ ప్రాంతాల ప్రజలు పప్పూ యాదవ్ను డాన్గా, రాబిన్ హుడ్గా చూస్తారు. అవసరం ఉన్న వాళ్లను ఆదుకోవటం తన విధి అంటున్నారు పప్పూ యదవ్. 1994లో కాంగ్రెస్ నేత, మాజీ ఎంపీ రంజిత రాజన్ను వివాహం చేసుకున్నారు.
ప్రక్షాళనే లక్ష్యం!
ప్రస్తుతం అవినీతిలో కూరుకుపోయిన వ్యవస్థకు వ్యతిరేకంగా పోరాడటమే తన విధి అంటున్నారు పప్పూ యాదవ్. అదే సమయంలో అధికార పక్షంపై విమర్శలు గుప్పిస్తున్నారు. ఓట్ల కోసం నితీశ్ కుమార్ పాకులాడుతున్నారని ఆరోపిస్తున్నారు. తన దూకుడు యువతకు నచ్చుతుందని చెబుతూనే.. యువ నేత తేజస్వీ యాదవ్పై విరుచుకుపడుతున్నారు.
ఆర్జేడీతో విభేదాలు
ఆర్జేడీలో ఉన్న సమయంలోనూ పప్పూ యాదవ్ పార్టీతో విభేదించిన సందర్భాలు చాలా ఉన్నాయి. లాలూ మాట తప్ప పార్టీలో వేరెవరి మాటా విననంటూ ఆయన ప్రకటనలు సైతం చేశారు. బిహార్ మాజీ ముఖ్యమంత్రి జీతన్ రాం మాంఝీని 'అసమర్థ' నేతగా అభివర్ణించిన సందర్భాలు ఉన్నాయి.
ప్రస్తుతం కూటమి కట్టిన పార్టీలకు నాయకుడిగా వ్యవహరిస్తున్న పప్పూ యాదవ్.. అధికారం పక్షం నేతలు నితీశ్ కుమార్, సుశీల్ కుమార్ మోదీపై విరుచుకుపడుతున్నారు.
బిహార్లో వరదలు పొటెత్తినపుడు రాష్ట్ర ముఖ్యమంత్రి, ఉపముఖ్యమంత్రి ఇంట్లో కూర్చొని చోద్యం చూశారు. ఆ సమయంలో నేనే కష్టపడి పని చేశాను. ప్రజలకు ఆహారం, మందులు అందించాను. బిహార్ ఇబ్బందుల్లో ఉన్నప్పుడు వారిద్దరూ కాడి వదిలేశారు. పప్పూ యాదవ్ ఒక్కడే వారి వద్దకు వెళ్లి.. కష్టాలు తెలుసుకున్నాడు. నేను బిహార్ పుత్రుడిని. ప్రజలకు ఎప్పుడూ రుణపడే ఉంటాను.
రాష్ట్ర రాజకీయాల్లో ఓట్ల కోసం పాకులాడే వ్యక్తుల జాబితాలో నితీశ్ కుమార్ తర్వాతే ఇంకెవరైనా. బిహార్ ప్రజలు ఇప్పటికే 15 ఏళ్ల లాలూ పాలన, మరో 15 ఏళ్లు నితీశ్ పాలన చూశారు. కానీ ఇప్పుడు నాయకత్వంలో మార్పు రావాలి. కేవలం 3ఏళ్లు అధికారం ఇవ్వమనండి మార్పంటే చూపిస్తాం.
-పప్పూ యాదవ్, జన్ అధికార్ పార్టీ అధినేత
ఈ నేపథ్యంలోనే పప్పూ యాదవ్.. రాష్ట్రంలో ప్రత్యామ్నాయ శక్తిగా ఎదిగేందుకు ప్రోగ్రెసివ్ డెమొక్రటిక్ అలయన్స్(పీడీఏ) తరఫున 243 స్థానాల్లో అభ్యర్థులను నిలబెట్టారు.
పప్పూ యాదవ్ ప్రభావం బిహార్ రాజకీయాల్లో ఎంత మేరకు ఉంటుందనేది మరో నెలలో తేలనుంది. అయితే, గతేడాది సార్వత్రిక ఎన్నికల్లో పప్పూ యాదవ్ పార్టీ అభ్యర్థులందరూ డిపాజిట్లు కోల్పోవటం కొసమెరుపు.
ఇదీ చూడండి: బిహార్ బరి: పద్మవ్యూహాన్ని తలపిస్తున్న రాజకీయం..!
ఇదీ చూడండి: బిహార్ బరి: వామపక్షాలు అస్థిత్వం కాపాడుకునేనా?
