ప్రధానమంత్రి నరేంద్ర మోదీ పాలనపై కేంద్ర మైనారిటీ వ్యవహారాలశాఖ మంత్రి ముఖ్తార్ అబ్బాస్ నఖ్వీ ప్రశంసల వర్షం కురిపించారు. గత ప్రభుత్వాల పాలనలోని లోపాలను వెలికితీసి.. తనదైన శైలిలో మోదీ పరిష్కరించారన్నారు. వ్యవస్థలన్నిటి నుంచి మెరుగైన పనితీరును రాబట్టే విధంగా అనేక చర్యలు చేపట్టారన్నారు.
'పాత పద్ధతులకు చెక్...'
'కల్చర్ ఆఫ్ పరిక్రమ రిప్లేస్డ్ బై కమిట్మెంట్ ఆఫ్ పర్ఫార్మెన్స్' అనే శీర్షికతో ఓ వ్యాసాన్ని రాసుకొచ్చారు నఖ్వీ. దేశాన్ని పాలించే విధానంలో ప్రధాని మోదీ శైలిని ప్రస్తావించారు. గత ప్రభుత్వాలకు- మోదీ పాలనకు మధ్య చాలా వ్యత్యాసం ఉందన్నారు.
కాంగ్రెస్పైనా పరోక్షంగా విమర్శనాస్త్రాలు సంధించారు నఖ్వీ. ఎన్నో ఏళ్లుగా.. అధికారులు ప్రజలను తమ చుట్టూ తిప్పుకునే వారని ఆరోపించారు. వాటన్నిటికీ మోదీ ప్రభుత్వం చెక్ పెట్టిందని స్పష్టం చేశారు. పనితీరుపైనే ఉద్యోగం ఆధారపడి ఉంటుందని రుజువు చేశారని ప్రశంసించారు.
