దేశంలో కరోనా మహమ్మారి విస్తరిస్తున్న నేపథ్యంలో వైరస్ను గుర్తించేందుకు పరీక్షల సామర్థ్యాన్ని పెంచాలని ప్రధానమంత్రి నరేంద్ర మోదీని కాంగ్రెస్ సీనియర్ నేత రాహుల్ గాంధీ సూచించారు. దేశంలో ప్రస్తుతం రోజుకు 40వేల వరకు కరోనా టెస్టులు మాత్రమే జరుగుతున్నాయని, ఆ సంఖ్యను లక్షకు పెంచాలన్నారు.
"భారీ సంఖ్యలో నిర్ధరణ పరీక్షలు నిర్వహిస్తేనే వైరస్ను కట్టడి చేయగలమని నిపుణులు సూచిస్తున్నారు. కొన్ని అవరోధాల వల్ల కిట్లు అందుబాటులో ఉన్నప్పటికీ.. రోజుకు లక్షకు బదులు కేవలం 40వేల పరీక్షలే జరుగుతున్నాయి. ప్రధాని వేగంగా చర్యలు చేపట్టి అడ్డంకులను తొలగించి.. పరీక్షల సామర్థ్యాన్ని పెంచాలి. "
- రాహుల్ గాంధీ, కాంగ్రెస్ నేత
'జవాబుదారీతనం లేదు '
ప్రధాని మోదీ పాలనలో జవాబుదారీతనం లేకుండా పోయిందని సీపీఐ(ఎం) ప్రధాన కార్యదర్శి సీతారామ్ ఏచూరి మండిపడ్డారు. ఇతర దేశాల్లో ప్రభుత్వంలోని ప్రధాన నేతలు మీడియా ముందుకు వచ్చి కరోనాపై తాజా పరిస్థితులను వివరిస్తున్నారని.. మీడియా అడిగిన ప్రశ్నలకు సమాధానమిస్తున్నారని గుర్తు చేశారు. కానీ భారత్లో అలాంటి పరిస్థితి లేదన్నారు.
"ఇతర దేశాల్లో నేతలు రోజు మీడియా సమావేశం నిర్వహిస్తున్నారు. సమాధానాలకు జవాబు చెబుతున్నారు. జవాబుదారీగా ఉంటూ, వైరస్ను కట్టడి చేయడంలో దేశం మెరుగైన స్థానంలో ఉందని చెప్పడానికి ఇదే మార్గం. కేరళ ముఖ్యమంత్రి పినరయి విజయన్ రోజు మీడియా సమావేశం నిర్వహిస్తారు. కరోనా కట్టడికి చేపట్టిన చర్యలను వివరిస్తారు. కానీ ప్రధాని మోదీ అలా చేయడం లేదు."
- సీతారాం ఏచూరి, సీపీఎం ప్రధాన కార్యదర్శి
ఆకస్మికంగా చేసిన లాక్డౌన్ ప్రకటనతో దేశ ప్రజలు అనేక ఇబ్బందులను ఎదుర్కొంటున్నారని ఏచూరి ఆరోపించారు. లాక్డౌన్ పరిణామాలను భవిష్యత్లో ఎదుర్కొనేందుకు రాష్ట్ర ప్రభుత్వాలు సన్నద్ధం కాలేదన్నారు.
ఇదీ చూడండి:- 'కరోనా టెస్టుల్లో దూకుడేది? ఇలా అయితే కష్టమే'
