'మన ప్రధానమంత్రి మంచి సేల్స్​మన్​'

భాజపా తిరిగి అధికారంలోకి రావడానికి కారణం ప్రధాని నరేంద్రమోదీ మంచి సేల్స్​మన్​ కావటమేనని కాంగ్రెస్ లోక్​సభ పక్షనేత అధీర్​ రంజన్​ చౌదరి వ్యంగ్యాస్త్రాలు సంధించారు. లోక్​సభలో రాష్ట్రపతి ప్రసంగం ధన్యవాద తీర్మానంపై చర్చలో భాగంగా ఆయన మాట్లాడారు. కాంగ్రెస్​పై అవినీతి ఆరోపణలను ప్రచారం చేసి భాజపా అధికారంలోకి వచ్చిందని విమర్శించారు.

ప్రధాని నరేంద్రమోదీతో పాటు కేంద్ర ప్రభుత్వంపై నిప్పులు చెరిగారు కాంగ్రెస్ లోక్​సభ పక్షనేత అధీర్ రంజన్​ చౌదరి. అబద్ధాలతోనే రెండు సార్లు అధికారంలోకి వచ్చారని విమర్శించారు. లోక్​సభలో రాష్ట్రపతి ధన్యవాద తీర్మానంపై చర్చలో భాజపా తీరుపై మండిపడ్డారు అధీర్​.

"మోదీ మొదటి ఐదేళ్లు.. ఇప్పుడు మరో ఏడాది. మొత్తం ఆరేళ్లు. 2-జీ కుంభకోణంలో ఎవరినైనా అరెస్ట్​ చేశారా? రాహుల్ గాంధీ, సోనియా గాంధీలను జైలుకు ఎందుకు పంపలేదు? ఎవరినైతే దొంగలని చెబుతూ మీరు అధికారంలోకి వచ్చారో వాళ్లు ఇప్పుడు సభలో ఎందుకున్నారు? జైలులో ఎందుకు లేరు? ఇక ఈ ఉత్పత్తులు అమ్ముడుపోవు. ఈ సారి మీరు మరో కొత్త ఉత్పత్తిని తీసుకొస్తారు. ఎందుకంటే ప్రధానమంత్రి ఓ పెద్ద సేల్స్​మన్. మా ఉత్పత్తులను మేం అమ్ముకోలేకనే ఎన్నికల్లో ఓడిపోయాం."

- అధీర్​ రంజన్​ చౌదరి, కాంగ్రెస్ పక్షనేత

ఇదీ చూడండి: కార్గిల్​, బాలాకోట్​పై ధనోవా చెప్పిన ఆసక్తికర విషయాలు