కరోనా ప్రమాదం ఇప్పటికీ ఉందని ప్రధానమంత్రి నరేంద్ర మోదీ అన్నారు. మహారాష్ట్రలో పరిస్థితి కాస్త ఆందోళనకరంగా ఉందని పేర్కొన్నారు. మాస్కులు ధరించి, వ్యక్తిగత దూరం పాటించడంలో అలసత్వం ఉండకూడదని ప్రజలందరికీ విజ్ఞప్తి చేశారు. ఈ పోరులో తప్పక విజయం సాధిస్తామని మోదీ పునరుద్ఘాటించారు.
కేంద్ర మాజీ మంత్రి, పద్మభూషణ్ అవార్డు గ్రహీత డాక్టర్ బాలాసాహెబ్ వీఖే పాటిల్ ఆత్మకథ ఆవిష్కరణ సభలో మోదీ వర్చువల్గా పాల్కొన్నారు. ఈ కార్యక్రమంలో.. 'ప్రవర రూరల్ ఎడ్యుకేషన్ సొసైటీ' పేరును 'డా. బాలాసాహెబ్ వీఖే పాటిల్ ప్రవర రూరల్ ఎడ్యుకేషన్ సొసైటీ'గా మార్పు చేశారు.
'అభివృద్ధికి ఆయన జీవితం అంకితం'
పాటిల్ ఆత్మకథ ఇప్పుడు విడుదలైనప్పటికీ.. ఆయన గురించి మహారాష్ట్రలో ప్రతి ఒక్కరికి తెలుసన్నారు మోదీ. మహారాష్ట్ర అభివృద్ధికి ఆయన జీవితాన్ని అంకితం చేశారని కీర్తించారు.
"సమాజంలో అర్ధవంతమైన మార్పు కోసం రాజకీయాలను ఓ మాధ్యమంగా ఎలా మార్చాలి, గ్రామీణులు, పేదల సమస్యలను ఎలా పరిష్కరించాలనే విషయాలను ఆయన ఎప్పుడో నొక్కిచెప్పారు. ఇదే ఆయనను ఇతరుల నుంచి భిన్నంగా ఉండేలా చేసింది."
- ప్రధానమంత్రి నరేంద్ర మోదీ
తమ ప్రభుత్వం తీసుకొచ్చిన చారిత్రక వ్యవసాయ చట్టాల వల్ల రైతులకు ఎన్నో ప్రయోజనాలు కలుగుతాయని చెప్పారు మోదీ. రైతులు.. పారిశ్రామికవేత్తలుగా మారేందుకు ఈ చట్టాలు ఉపయోగపడతాయన్నారు. రైతుల ఆదాయం పెంచేందుకు తమ ప్రభుత్వం కట్టుబడి ఉన్నట్లు తెలిపారు.
ఈ కార్యక్రమంలో మహారాష్ట్ర ముఖ్యమంత్రి ఉద్ధవ్ ఠాక్రే, అహ్మద్నగర్ ఎంపీ డా. సుజయ్ వీఖే పాటిల్, ప్రవర మెడికల్ ట్రస్ట్, ప్రవర షుగర్ ఫ్యాక్టరీ అధికారులు పాల్గొన్నారు.
