'మోదీ జీ మౌనం వీడండి.. కేసులు పెరిగిపోతున్నాయ్​'

దేశంలో కరోనా మహమ్మారి విజృంభిస్తున్న నేపథ్యంలో కేంద్రంపై మరోమారు విమర్శనాస్త్రాలు సంధించారు కాంగ్రెస్​ నేత రాహుల్​ గాంధీ. ప్రధాని మోదీ వైరస్​కు లొంగిపోయి మౌనంగా ఉండి పోయారని.. కరోనా​ కట్టడికి వారి వద్ద ఎలాంటి ప్రణాళిక లేదని విమర్శించారు.

దేశంలో కరోనా కేసులు 5 లక్షల దాటిన క్రమంలో కేంద్ర ప్రభుత్వంపై మరోమారు విమర్శనాస్త్రాలు ఎక్కుపెట్టారు కాంగ్రెస్​ అగ్రనేత రాహుల్​ గాంధీ. "ప్రధానమంత్రి నరేంద్ర మోదీ మౌనంగా ఉన్నారు.. కానీ, కేసులు పెరుగుతూనే ఉన్నాయి" అని వ్యంగాస్త్రాలు సంధించారు. కరోనా వైరస్​పై పోరాడలేక ప్రధాని లొంగిపోయారని ఆరోపించారు.

రాహుల్​ గాంధీ ట్వీట్​

" దేశంలోని కొత్త ప్రాంతాలకు కరోనా మహమ్మారి వేగంగా వ్యాపిస్తోంది. కానీ, దానిని అరికట్టేందుకు కేంద్ర ప్రభుత్వం వద్ద ఎలాంటి ప్రణాళిక లేదు. ప్రధాని మౌనం వీడటం లేదు. ఆయన లొగిపోయారు. వైరస్​పై​ పోరాడటానికి నిరాకరిస్తున్నారు. "

- రాహుల్ గాంధీ, కాంగ్రెస్​ అగ్రనేత

కరోనాకు అడ్డుకట్ట వేయటంలో ప్రభుత్వం చేతులెత్తేసిందని ఆరోపించారు రాహుల్. కొద్ది రోజులుగా ఐసీఎంఆర్, మంత్రుల​ సమావేశాలు జరగటం లేదని, కనీసం ఆరోగ్య శాఖ రోజువారీ బ్రీఫింగ్​ కూడా చేయటం లేదనే కొన్ని నివేదికలు ట్వీట్​కు ట్యాగ్​ చేశారు​.

ఇదీ చూడండి: తెలుగు జాతి అనర్ఘరత్నం పీవీ నరసింహారావు