ఈశాన్య దిల్లీలో చెలరేగిన అల్లర్లపై సుప్రీంకోర్టు, దిల్లీ హైకోర్టుల్లో మంగళవారం పిటిషన్లు దాఖలయ్యాయి. ఈ పిటిషన్లపై సర్వోన్నత న్యాయస్థానం నేడు విచారణ చేపట్టనుంది.
పౌరసత్వ చట్ట సవరణ అనుకూల, వ్యతిరేక వర్గాల మధ్య చెలరేగిన ఘర్షణలు హింసాత్మకంగా మారాయి. ఈ నేపథ్యంలో ఘర్షణలకు సంబంధించిన ఫిర్యాదులపై ఎఫ్ఐఆర్ నమోదు చేసేలా పోలీసులకు దిశానిర్దేశం చేయాలని కోరుతూ మాజీ చీఫ్ ఇన్ఫర్మేషన్ కమిషనర్ వజాహత్ హబీబుల్లా, భీమ్ ఆర్మీ చీఫ్ చంద్రశేఖర్ ఆజాద్ తదితరులు సుప్రీంకోర్టులో పిటిషన్ దాఖలు చేశారు.
జస్టిస్ ఎస్.కె.కౌల్, జస్టిస్ కె.ఎం.జోసెఫ్లతో కూడిన ద్విసభ్య ధర్మాసనం ఈ పిటిషన్పై విచారణ చేపట్టనుంది. అలాగే సీఏఏకు వ్యతిరేకంగా షాహీన్బాగ్లో నిరసన వ్యక్తం చేసిన మహిళలకు రక్షణ కల్పించాలన్న మరో పిటిషన్ను కూడా సుప్రీం విచారించనుంది. దీనిపై ఇప్పటికే.. కోర్టు నియమించిన మధ్యవర్తులు సీల్డ్ కవర్లో ఓ నివేదికను దాఖలు చేశారు.
దిల్లీ హైకోర్టులో
ఈశాన్య దిల్లీ అల్లర్లపై మానవహక్కుల కార్యకర్త హక్ష్ మాండర్, ఫరా నఖ్వీ దాఖలు చేసిన మరో రెండు పిటిషన్లను నేడు దిల్లీ హైకోర్టు విచారించనుంది. హింసకు పాల్పడిన వ్యక్తులపై ఎఫ్ఐఆర్ నమోదు చేసి, అరెస్టు చేయాలని వీరు న్యాయస్థానాన్ని కోరారు. షాహీన్బాగ్తో సహా సీఏఏకు వ్యతిరేకంగా నిరసనలు వ్యక్తం చేసిన ఇతర ప్రాంతాల్లోని మహిళలకు కూడా రక్షణ కల్పించాలని వీరు తమ పిటిషన్లో పేర్కొన్నారు.
ద్వేషపూరిత ప్రసంగాలు!
భాజపా నేతలు అనురాగ్ ఠాకూర్, పర్వేష్ వర్మ, కపిల్ మిశ్రా ద్వేషపూరిత ప్రసంగాలు చేశారని, హింసను ప్రేరేపించారని, వీరిపై చర్య తీసుకోవాలని దిల్లీ హైకోర్టులో పిటిషన్ దాఖలైంది.
పౌర చట్టం వ్యతిరేక, అనుకూల వర్గాలు ఈ నెల 23న చేపట్టిన ఆందోళనలతో దిల్లీలో ఘర్షణలు ప్రారంభం అయ్యాయి. ఒకరిపై ఒకరు రాళ్లు రువ్వుకుంటూ, ఇళ్లు, దుకాణాలు, వాహనాలు తగులబెట్టారు. ఈ అల్లర్లలో ఓ హెడ్ కానిస్టేబులో సహా ఇప్పటి వరకు 13 మంది ప్రాణాలు కోల్పోయారు.
ఇదీ చూడండి: భారత్-అమెరికా: 'సమగ్ర వాణిజ్య ఒప్పందంతో ముందుకు!'
