ఈశాన్య దిల్లీలో చెలరేగిన అల్లర్లపై మంగళవారం సుప్రీంకోర్టు, దిల్లీ హైకోర్టుల్లో పిటిషన్లు దాఖలయ్యాయి. ఈ పిటిషన్లపై సర్వోన్నత న్యాయస్థానం బుధవారం విచారణ చేపట్టనుంది.
పౌరసత్వ చట్ట సవరణ అనుకూల, వ్యతిరేక వర్గాల మధ్య చెలరేగిన ఘర్షణలు ఇంకా కొనసాగుతూనే ఉన్నాయి. ఈ నేపథ్యంలో ఘర్షణలకు సంబంధించిన ఫిర్యాదులపై ఎఫ్ఐఆర్ నమోదు చేసేలా పోలీసులకు దిశానిర్దేశం చేయాలని కోరుతూ మాజీ చీఫ్ ఇన్ఫర్మేషన్ కమిషనర్ వజాహత్ హబీబుల్లా, భీమ్ ఆర్మీ చీఫ్ చంద్రశేఖర్ ఆజాద్ తదితరులు సుప్రీంకోర్టులో పిటిషన్ దాఖలు చేశారు.
జస్టిస్ ఎస్.కె.కౌల్, జస్టిస్ కె.ఎం.జోసెఫ్లతో కూడిన ద్విసభ్య ధర్మాసనం బుధవారం ఈ పిటిషన్పై విచారణ చేయనుంది. అలాగే సీఏఏకు వ్యతిరేకంగా షాహీన్బాగ్లో నిరసన వ్యక్తం చేసిన మహిళలకు రక్షణ కల్పించాలన్న మరో పిటిషన్ను కూడా సుప్రీం రేపు విచారించనుంది. దీనిపై కోర్టు నియమించిన మధ్యవర్తులు సీల్డ్ కవర్లో ఓ నివేదికను దాఖలు చేశారు.
దిల్లీ హైకోర్టులో
ఈశాన్య దిల్లీ అల్లర్లపై మానవహక్కుల కార్యకర్త హక్ష్ మాండర్, ఫరా నఖ్వీ దాఖలు చేసిన మరో రెండు పిటిషన్లను రేపు దిల్లీ హైకోర్టు విచారించనుంది. హింసకు పాల్పడిన వ్యక్తులపై ఎఫ్ఐఆర్ నమోదు చేసి, అరెస్టు చేయాలని వీరు న్యాయస్థానాన్ని కోరారు. షాహీన్బాగ్తో సహా సీఏఏకు వ్యతిరేకంగా నిరసనలు వ్యక్తం చేసిన ఇతర ప్రాంతాల్లోని మహిళలకు కూడా రక్షణ కల్పించాలని వీరు తమ పిటిషన్లో పేర్కొన్నారు.
ద్వేషపూరిత ప్రసంగాలు!
భాజపా నేతలు అనురాగ్ ఠాకూర్, పర్వేష్ వర్మ, కపిల్ మిశ్రా ద్వేషపూరిత ప్రసంగాలు చేశారని, హింసను ప్రేరేపించారని, వీరిపై చర్య తీసుకోవాలని దిల్లీ హైకోర్టులో పిటిషన్ దాఖలైంది.
ఫిబ్రవరి 23న సీఏఏకు వ్యతిరేకంగా జాఫ్రాబాద్లో శాంతియుత ర్యాలీ జరిగింది. దీనికి వ్యతిరేకంగా 2కి.మీ దూరంలో భాజపా నేత కపిల్ మిశ్రా సీఏఏకు అనుకూలంగా మౌజ్పుర్,బాబర్పుర్ మెట్రో స్టేషన్ల పక్కన ర్యాలీ నిర్వహించారు. ఫలితంగా ఇరువర్గాల మధ్య ఘర్షణ చెలరేగాయి. ఒకరిపై ఒకరు రాళ్లు రువ్వుకుంటూ, ఇళ్లు, దుకాణాలు, వాహనాలు తగులబెట్టారు. దిల్లీలోని చాంద్బాగ్, భజన్పురా ప్రాంతాల్లో కూడా అల్లర్లు చెలరేగాయి. ఈ అల్లర్లలో దిల్లీ హెడ్ కానిస్టేబుల్ రతన్లాల్ సహా ఇప్పటి వరకు 13 మంది ప్రాణాలు కోల్పోయారు.
ఇదీ చూడండి: భారత్-అమెరికా: 'సమగ్ర వాణిజ్య ఒప్పందంతో ముందుకు!'
