తూర్పు లద్దాఖ్లోని వాస్తవాధీన రేఖ వెంబడి ఉన్న చైనా సైనికుల నైతిక స్థైర్యం అత్యంత తక్కువగా ఉందని నిఘా వర్గాలు తెలిపాయి. దుర్భరమైన పరిస్థితులు, అతి తక్కువ ఉష్ణోగ్రతలు, కఠినమైన వాతావరణ పరిస్థితుల మధ్య చైనా సైనికుల మనోధైర్యం సన్నగిల్లిందని వెల్లడించాయి.
భారత సరిహద్దులో యథాతథ స్థితిని సవాల్ చేస్తూ సైన్యాన్ని ఎల్ఏసీ వద్ద భారీగా మోహరించింది చైనా. వేలాది మంది సైనికులను వాస్తవాధీన రేఖకు చేర్చింది. ఇక్కడి ఉష్ణోగ్రతలు మైనస్ 30 డిగ్రీల సెల్సియస్కు పడిపోవడం వల్ల డ్రాగన్ సేనలు తీవ్ర అవస్థలు పడుతున్నారని అధికారులు తెలిపారు. ఇది చైనా పీపుల్స్ లిబరేషన్ ఆర్మీ(పీఎల్ఏ)కి ఆందోళన కలిగిస్తోందని పేర్కొన్నారు. వారి నైతిక స్థితి అత్యంత కనిష్ఠ స్థాయికి పడిపోయిందని వివరించారు.
వినోద సౌకర్యాలు
ఈ పరిస్థితుల్లో వీరికి ధైర్యం కల్పించేందుకు వినోద కేంద్రాలను చైనా ఏర్పాటు చేస్తున్నట్లు సంబంధిత వర్గాలు తెలిపాయి. ఫిట్నెస్ సెంటర్లు, వేడినీటి ఈత కొలనులు, హాట్ టబ్లు, గ్రంథాలయాలను అందుబాటులోకి తీసుకొస్తున్నట్లు చెప్పాయి. వినోద కేంద్రాలలో కంప్యూటర్లు, ప్లే స్టేషన్లను సైతం ఏర్పాటు చేస్తున్నట్లు వెల్లడించాయి. భారత్లోని చుషుల్కు సమీపంలో ఉండే మోల్డోని సైనిక శిబిరంలో ఇలాంటి ఓ వినోద కేంద్రం నెలకొల్పినట్లు వివరించాయి.
దుస్తుల కొరత
విపరీతమైన చలి ఉన్న నేపథ్యంలో చైనా సైనికులు పలు ఇబ్బందులు ఎదుర్కొటున్నారని అధికారులు తెలిపారు. సరైన దుస్తులు, వసతి సౌకర్యాలు లేక అనేక అవస్థలు పడుతున్నారని చెప్పారు. శీతల వాతావరణాన్ని తట్టుకొనే ప్రత్యేకమైన దుస్తుల కొరత ఏర్పడిందని.. వీటిని అత్యవసరంగా కొనుగోలు చేసేందుకు చైనా ఏర్పాట్లు చేసుకుందని తెలిపారు. ఇందుకోసం నాణ్యత పర్యవేక్షణ బృందాలను.. పీఎల్ఏ జాయింట్ లాజిస్టిక్స్ సపోర్ట్ ఫోర్స్(జేఎల్ఎస్ఎఫ్) ఏర్పాటు చేసిందని చెప్పారు. సైన్యం పహారా కాస్తున్న ప్రాంతాలకు నాణ్యమైన దుస్తులను వేగంగా సరఫరా చేయాలని ఈ బృందానికి ఆదేశాలు జారీ అయినట్లు వెల్లడించారు. ఈ బృందం నేరుగా సెంట్రల్ మిలిటరీ కమిషన్కు నివేదిస్తోందని పేర్కొన్నారు.
ఎల్ఏసీ వద్ద ఎనిమిది నెలలుగా భారత్, చైనా సైనికుల మధ్య ప్రతిష్టంభన కొనసాగుతోంది. సైనిక, దౌత్య మార్గాల్లో పలు దఫాలుగా చర్చలు జరిగినప్పటికీ.. ఇంతవరకు ఎలాంటి ఫలితం లభించలేదు.
ఇదీ చదవండి- 'ఆక్స్ఫర్డ్ టీకాపై తొందరొద్దు- ఫలితం మారొచ్చు'
