మహారాష్ట్రలో నవంబర్ 16(సోమవారం) నుంచి ఆలయాలు, ప్రార్థనా స్థలాలు పునఃప్రారంభం కానున్నాయి. ఈ మేరకు అనుమతినిస్తూ ఉత్తర్వులు జారీ చేశారు ఆ రాష్ట్ర సీఎం ఉద్ధవ్ ఠాక్రే. ఫలితంగా సుదీర్ఘ లాక్డౌన్ అనంతరం అక్కడ ఆలయాలు, ప్రార్థనా స్థలాలు మళ్లీ తెరుచుకోనున్నాయి.
దీపావళి సందర్భంగా రాష్ట్ర ప్రజలకు శుభాకాంక్షలు చెప్పిన ఠాక్రే.. కరోనా పట్ల మరింత అప్రమత్తంగా ఉండాలని సూచించారు. కొద్ది రోజులుగా రాష్ట్రంలో కొవిడ్ కేసులు తగ్గుముఖం పట్టాయని.. ఇంతటితో వైరస్ పూర్తిగా పోలేదని, ప్రతి ఒక్కరూ నిబంధనలు పాటించాల్సిన అవసరముందన్నారు. వేడుక ఏదైనా.. కరోనా మార్గదర్శకాలు(మాస్కులు, భౌతిక దూరం) తప్పనిసరి అని పునరుద్ఘాటించారు ఠాక్రే. క్రమశిక్షణతో మెలిగితే... దేవుని ఆశీర్వాదం తప్పక లభిస్తుందన్నారు.
జూన్లో అన్లాక్ ప్రక్రియ ప్రారంభమైనా రాష్ట్రంలో మాత్రం ఆలయాలు మూసివేయడంపై పలుమార్లు విమర్శలు గుప్పించింది భాజపా. ఈ విషయం ఆ రాష్ట్ర గవర్నర్ భగత్ సింగ్ కోశ్యారీ, ఠాక్రేల మధ్య వివాదానికీ దారితీసంది.
ఇదీ చదవండి: సరిహద్దులో ఐటీబీపీ జవాన్ల దీపావళి సంబరాలు
