పక్క వీధిలో కరోనా సోకిన వ్యక్తి ఉన్నాడంటేనే ప్రాణం గజగజలాడిపోతుంది. అలాంటి 24 గంటలు కరోనా రోగుల పక్కనే ఉంటూ ప్రాణాలకు తెగించి వైద్యం చేస్తారు వైద్యులు. దిల్లీలోని రాజీవ్గాంధీ సూపర్ స్పెషాలిటీ ఆస్పత్రి డాక్టర్లు, నర్సులు అయితే వైద్యంతో పాటు .. నిర్బంధంలో ఉన్న రోగుల ఒంటరితనాన్నీ దూరం చేస్తున్నారు.
బతుకుపై భరోసా కల్పిస్తూ....
తూర్పు దిల్లీలో 500 పడకల సౌకర్యంతో.. కరోనా బాధితులకు వైద్యం అందిస్తోంది రాజీవ్ గాంధీ ఆసుపత్రి. నెల రోజుల నుంచి 'మే ఐ హెల్ప్ యూ' బృందాన్ని ఏర్పాటు చేసి రోగులతో ముచ్చటిస్తూ.. వారికి బతుకుపై భరోసా కల్పిస్తోంది.
"'చేరుకోలేని వారిని చేరుకుందాం' అనే నినాదంతో ఈ కార్యక్రమం ప్రారంభించాం. నిర్బంధంలో ఉన్నవారిలో ఒంటరితనాన్ని పోగొట్టి, బతుకుపై ఆశలు పెంచేందుకు ఈ కార్యక్రమం చేపట్టాం. ఇందులో భాగంగా నర్సులు బాధితులకు స్వయంగా ఫోన్లు చేస్తారు. వీలుంటే దగ్గరగా వెళ్లి మాట్లాడతారు. బాధితులు వారి అభిప్రాయాలను, జీవితంలో జరిగిన సంఘటనలను మాతో పంచుకుంటారు. ఆసుపత్రిలో అసౌకర్యాలేమైనా ఉంటే చెప్పుకుంటారు. వాటిని మేము పరిష్కరిస్తాం."
-డా. బీఎల్ శేర్వాల్, ఆసుపత్రి డైరక్టర్
మూడు రోజుల క్రితమే కరోనాను జయించి... రాజీవ్ గాంధీ సూపర్ స్పెషాలిటీ ఆసుపత్రి నుంచి డిశ్చార్జ్ అయిన 65 ఏళ్ల అమెరికా మహిళ.. "రాజీవ్ గాంధీ ఆసుపత్రి సిబ్బందికి నా హృదయ పూర్వక ధన్యవాదాలు.. వారి సేవ అమోఘం. మీ నైపుణ్యం, చిట్కాలే నన్ను కాపాడాయి" అంటోంది.
"తబ్లీగీ జమాత్ సభ్యుల్లో చాలా మందిని నిజాముద్దీన్ నుంచి ఈ ఆసుపత్రికి తీసుకొచ్చారు. అప్పట్లో వారిలో కొందరు వైద్యుల పట్ల ప్రవర్తించిన తీరును సామాజిక మాధ్యమాల్లో అందరూ చూశారు. ఓ సాధారణ మనిషిని నిర్భంధిస్తే.. తన మానసిక స్థితి ఎలా భిన్నంగా మారుతుందో ఆ వీడియోల్లో చూడొచ్చు. అందుకే, వారికి ముందు ప్రశాంతమైన వాతావరణాన్ని ఏర్పాటు చేసి.. ఒంటరితనాన్ని దూరం చేస్తున్నాం. "
-డా. బీఎల్ శేర్వాల్, ఆసుపత్రి డైరక్టర్
దిల్లీలో కరోనా విజృంభిస్తూనే ఉంది. శనివారం ఒక్కరోజులోనే 2,134 కేసులు నమోదయ్యాయి. దీంతో మొత్తం కేసుల సంఖ్య 38 వేలు దాటిపోయింది.
ఇదీ చదవండి:'కరోనా దేవి'కి నిత్య పూజలు- రాజ్యాంగం ఇచ్చిన హక్కట!
