తీవ్ర గందరగోళం మధ్య ఆదివారం వ్యవసాయ బిల్లులకు పార్లమెంట్ ఆమోదం తెలిపింది. ఈ సందర్భంగా కేంద్ర వ్యవసాయ, రైతు సంక్షేమ శాఖ మంత్రి నరేంద్ర సింగ్ తోమర్ హర్షం వ్యక్తం చేశారు. వ్యవసాయ రంగంలో సంస్కరణల కోసం కేంద్రం ప్రతిపాదించిన ఈ రెండు బిల్లులు.. రైతుల జీవితాల్లో పెను మార్పులు తీసుకువస్తాయని ఆశాభావం వ్యక్తం చేశారు. ఆర్థిక వ్యవస్థ కూడా మరింత బలోపేతమవుతుందని అభిప్రాయపడ్డారు తోమర్.
బిల్లుల విషయంలో.. విపక్షాలు రైతులను తప్పుదోవ పట్టించే ప్రయత్నం చేస్తున్నాయని ఆవేదన వ్యక్తం చేశారు. ఈ మేరకు 'ఈటీవీ భారత్'తో మాట్లాడారు కేంద్ర మంత్రి నరేంద్ర సింగ్ తోమర్.
"వ్యవసాయానికి సంబంధించిన ఈ రెండు బిల్లులు చారిత్రాత్మకమైనవి. రైతుల జీవితాల్లో విప్లవాత్మక మార్పులు తీసుకువస్తాయి. ఇకపై వ్యవసాయదారులు తమ ఉత్పత్తులను దేశంలో ఎక్కడైనా స్వేచ్ఛగా విక్రయించుకోవచ్చు. ప్రధాని మోదీ.. తన నాయకత్వంలో రైతుల ప్రయోజనాలను పరిరక్షించారు."
- నరేంద్ర సింగ్ తోమర్, కేంద్ర వ్యవసాయ, రైతు సంక్షేమ శాఖ మంత్రి
వ్యవసాయం రంగంలో సంస్కరణల కోసం కేంద్రం ప్రతిపాదించిన బిల్లులకు పార్లమెంటు ఆమోదం లభించింది. ఇప్పటికే లోక్సభ గడప దాటిన ఫార్మర్స్‌ ప్రొడ్యూస్‌ ట్రేడ్‌ అండ్‌ కామర్స్‌ (ప్రమోషన్‌ అండ్‌ ఫెసిలిటేషన్‌), ఫార్మర్స్‌ (ఎంపవర్‌మెంట్‌ అండ్‌ ప్రొటెక్షన్‌) అగ్రిమెంట్‌ ఆన్‌ ప్రైస్‌ అష్యూరెన్స్‌ అండ్‌ ఫామ్‌ సర్వీసెస్‌ బిల్లులను.. గందరగోళం మధ్య సెప్టెంబర్ 20న రాజ్యసభ ఆమోదించింది. బిల్లులను విపక్షాలు వ్యతిరేకించాయి. కార్పొరేట్ శక్తులకు మేలు చేకుర్చేందుకు వీటిని తీసుకొచ్చారని ధ్వజమెత్తాయి.
ఇదీ చదవండి:
