కార్మిక చట్టాల్లో సంస్కరణలకు ఉద్దేశించిన మూడు కీలకమైన బిల్లులకు పార్లమెంట్ ఆమోదం లభించింది. పారిశ్రామిక సంబంధాలు, సామాజిక భద్రత, వృత్తిపరమైన రక్షణ కోడ్లకు రాజ్యసభ పచ్చజెండా ఊపింది. విపక్షాలు సభను బహిష్కరించడం వల్ల మూజువాణి ఓటుతో వీటిని ఆమోదించింది.
ఈ మూడు బిల్లులను లోక్సభ మంగళవారం ఆమోదించింది. ఈ నేపథ్యంలో బిల్లులను రాష్ట్రపతి సమ్మతి కోసం పంపించనున్నారు.
పారదర్శకత కోసమే
మారిన వ్యాపార వాతావరణానికి అనుగుణంగా పారదర్శకమైన వ్యవస్థను రూపొందించడమే ఈ కార్మిక సంస్కరణలు ప్రధాన ఉద్దేశమని కార్మిక శాఖ మంత్రి సంతోష్ కుమార్ గంగ్వార్ పేర్కొన్నారు. 300లోపు కార్మికులు ఉన్న సంస్థలకు ప్రభుత్వ అనుమతి లేకుండానే మూసివేసేందుకు పారిశ్రామిక సంబంధాల కోడ్లో అనుమతి ఇవ్వడంపై వివరణ ఇచ్చారు. ప్రస్తుతం 100గా ఉన్న నిబంధనను 300కి పెంచడంపై స్పష్టతనిచ్చారు. కార్మికుల అంశం రాజ్యాంగంలోని ఉమ్మడి జాబితాలో ఉందని గుర్తు చేశారు.
"ఇప్పటికే 16 రాష్ట్రాలు ఈ పరిమితిని 300కి పెంచాయి. పార్లమెంటరీ కార్మిక స్థాయీ సంఘం సైతం ఇదే సిఫార్సు చేసింది. చాలా సంస్థలు తమ కార్మికుల సంఖ్యను 100కు మించి పెంచవు. ఫలితంగా అనధికార ఉద్యోగాలు పెరిగిపోతున్నాయి. 2019 ఆర్థిక సర్వే ప్రకారం రాజస్థాన్లో ఉద్యోగ కల్పన మెరుగుపడింది. సిబ్బందిని తొలగించిన దాఖలాలు గణనీయంగా తగ్గాయి. కాబట్టి ఒక నిబంధన మార్చడం ద్వారా పెద్ద కర్మాగారాలను స్థాపించడానికి పెట్టుబడిదారులకు ప్రోత్సాహం లభిస్తుంది. తద్వారా దేశ కార్మికులకు ఉపాధి అవకాశాలు పెరుగుతాయి."
-సంతోష్ కుమార్ గంగ్వార్, కేంద్ర కార్మిక శాఖ మంత్రి
తాజా బిల్లులు కార్మికుల ప్రయోజనాలను పరిరక్షిస్తాయని తెలిపారు గంగ్వార్. ఉద్యోగుల భవిష్య నిధి పరిధి పెంచడం ద్వారా సామాజిక భద్రత అందుతుందని పేర్కొన్నారు. 40 కోట్ల మంది అసంఘటిత కార్మికులకు ఈ చర్య ప్రయోజనకరంగా ఉంటుందని వెల్లడించారు.
29 చట్టాలు నాలుగు కోడ్లుగా
ఈ సందర్భంగా 23 లేబర్ చట్టాలను నాలుగు కోడ్లుగా విలీనం చేయడం పూర్తయిందని మంత్రి పేర్కొన్నారు. నాలుగు కోడ్లలో ఒకటైన.. వేతనాల కోడ్ను పార్లమెంట్ గతేడాదే ఆమోదించింది. మిగిలిన మూడు కార్మిక కోడ్లకు తాజా వర్షాకాల సమావేశాల్లో ఉభయసభల అంగీకారం లభించింది. ఫలితంగా 29 కేంద్ర కార్మిక చట్టాలను నాలుగు కోడ్లుగా తీర్చిదిద్దాలన్న ప్రభుత్వ ఆలోచన కార్యరూపం దాల్చినట్లైంది. రాష్ట్రపతి ఆమోదం లభిస్తే ఇవి పూర్తి స్థాయి కోడ్లుగా అమలవుతాయి.
నాలుగు కోడ్లు ఇవే
- వృత్తిపరమైన రక్షణ, ఆరోగ్యం, పని పరిస్థితుల కోడ్, 2020- సంస్థలో చేరిన కార్మికులకు వృత్తి పరమైన రక్షణ, వైద్య సేవలతో పాటు పని ప్రదేశంలోని పరిస్థితులకు సంబంధించిన చట్టాలన్నీ ఈ కోడ్ పరిధిలోకి వస్తాయి.
- పారిశ్రామిక సంబంధాల కోడ్, 2020- ట్రేడ్ యూనియన్లు, పారిశ్రామిక వివాదాల పరిష్కారానికి సంబంధించిన చట్టాలను ఈ కోడ్ ఏకీకృతం చేస్తుంది.
- సామాజిక భద్రత కోడ్, 2020- సంఘటిత, అసంఘటిత రంగంలోని కార్మికులు, ఉద్యోగులందరికీ సామాజిక భద్రత కల్పించే చట్టాలు ఈ కోడ్ పరిధిలోకి వస్తాయి.
- వేతనాల కోడ్, 2019- దీన్ని పార్లమెంట్ గతేడాది ఆమోదించింది. వేతన చెల్లింపు చట్టం-1936, కనీస వేతన చట్టం-1948, బోనస్ చెల్లింపు చట్టం-1965, సమాన వేతన చట్టం-1976 సహా పలు చట్టాలను ఇది ఒక గూటికి చేర్చింది.
