పాక్​ మృత్యుక్రీడ

పాక్ కాల్పుల విరమణ ఒప్పందాన్ని పదే పదే ఉల్లంఘిస్తోంది. నియంత్రణ రేఖ వెంబడి జమ్మూకశ్మీర్​లోని రాజౌరీ, పూంఛ్​ జిల్లాల్లోని గ్రామాలు, సైనిక స్థావరాలే లక్ష్యంగా కాల్పులకు తెగబడుతోంది. ​

దాయాది పాకిస్థాన్​ మరోసారి కాల్పుల విరమణ ఒప్పందాన్ని ఉల్లంఘించింది. శాంతి వచనాలు వల్లిస్తూనే భారత్​ను దొంగదెబ్బ తీయాలని చూస్తోంది. జమ్మూకశ్మీర్​లోని సరిహద్దు గ్రామాలు, భారత సైనిక స్థావరాలే లక్ష్యంగా గుళ్ల వర్షం కురిపిస్తోంది. మోర్టార్లను ప్రయోగిస్తోంది. పాక్​ కవ్వింపు చర్యలకు భారత్​ సైన్యం దీటుగా బదులిస్తోంది.

జమ్మూకశ్మీర్​ రాజౌరీ జిల్లాలోని నౌషెరా, సుందరబని సెక్టార్లు, పూంఛ్ జిల్లాలోని కృష్ణాఘాటి సెక్టార్లపై ఇవాళ ఉదయం పాక్​ భారీగా కాల్పులకు తెగబడింది. భారత భద్రతా దళాలు దీటుగా స్పందిస్తున్నాయి. నౌషెరాలో 3 గంటలపాటు జరిగిన ఎదురుకాల్పుల్లో ఒక సైనికుడు గాయపడ్డాడు.

పాక్​ పైశాచికత్వం

పుల్వామా ఉగ్రదాడికి ప్రతీకారంగా భారత్​ జైషే మహ్మద్​​ ఉగ్రస్థావరాలపై దాడి చేసింది. దీనికి ప్రతిగా పాక్​ భారత భూభాగంపై వైమానిక దాడి చేసింది. దీనిని భారత్ సమర్థవంతంగా తిప్పికొట్టింది. అప్పటి నుంచి పాక్​ నియంత్రణ రేఖ వెంబడి తరచూ కాల్పుల విరమణ ఒప్పందాన్ని ఉల్లంఘిస్తూనే ఉంది.

గత వారం రోజులుగా కశ్మీర్​లో పాక్​ ఆడుతోన్న మృత్యుక్రీడకు నలుగురు వ్యక్తులు బలయ్యారు. పలువురు తీవ్రంగా గాయపడ్డారు.