బిహార్ ఎన్నికల్లో అనుకున్న దానికంటే మెరుగైన ఫలితాలు సాధించిన ఎంఐఎం పార్టీ.. వచ్చే బంగాల్ ఎన్నికల్లోనూ సత్తా చాటాలని చూస్తోంది. శాసనసభ ఎన్నికలు సమీపిస్తున్న తరుణంలో ఆ పార్టీ అధినేత అసదుద్దీన్ ఓవైసీ.. పశ్చిమ్ బంగాలోని ముస్లిం మతపెద్దలతో వరుసగా భేటీ అవుతున్నారు. భవిష్యత్ ప్రణాళికలు, కలిసి పోటీ చేసే విషయంపై అక్కడి ముస్లిం నాయకుడు అబ్బాస్ సిద్దిఖీతో చర్చలు జరిపినట్లు పార్టీ వర్గాలు తెలిపాయి. కొంతకాలంగా సిద్దిఖీ.. దీదీ ప్రభుత్వానికి వ్యతిరేకంగా మాట్లాడుతున్నారు. వచ్చే ఎన్నికల్లో పోటీ చేస్తారనే వార్తలు వినిపిస్తున్నాయి. ఈ నేపథ్యంలో వీరి కలయిక ప్రాధాన్యం సంతరించుకుంది.
బంగాల్ ఎన్నికల్లో పోటీ చేయనున్నట్లు ఆ పార్టీ ప్రకటించిన తర్వాత ఓవైసీ మొదటిసారిగా.. రాష్ట్రంలో పర్యటించారు. ఓవైసీ రాకను అధికార తృణమూల్ అడ్డుకుంటుందని ఆ పార్టీ నేతలు భావించారు. అందుకే ఈ సమావేశాన్ని రహస్యంగా ఉంచాలకున్నట్లు బంగాల్ ఎంఐఎం కార్యదర్శి జమీరుల్ హసన్ తెలిపారు.
ముస్లింలు అంతా మా వెంటే..
ఎంఐఎం అధినేత బంగాల్ పర్యటనపై అధికార పార్టీ నేతలు స్పందించారు. ఓవైసీ భాజపా చెప్పినట్లు నడుచుకుంటున్నారని ఆరోపించారు తృణమూల్ ఎంపీ సౌగతా రాయ్. బెంగాలీ మాట్లాడే ముస్లింలు మమత ప్రభుత్వానికే మద్దతుగా నిలుస్తారని తెలిపారు. ఈ విషయం తెలిసి ఓవైసీ.. సిద్దిఖీతో పొత్తుకు ప్రయత్నిస్తున్నారని అన్నారు. రాష్ట్రంలో దాదాపు 100-110 సీట్లలో ముస్లింలు నిర్ణయాత్మకంగా వ్యవహరిస్తున్నారని పేర్కొన్నారు. వారే తమ పార్టీకి బలమని రాయ్ అన్నారు.
ఇదీ చూడండి: ఉగ్ర అనుచరుడు అరెస్టు- ఆయుధాలు స్వాధీనం
