కరోనా ప్రభావం దేశ జనాభాపై ఇంకా అధికంగానే ఉందని భారత వైద్య పరిశోధన మండలి (ఐసీఎమ్ఆర్) చేసిన రెండో సెరో సర్వేలో తేలింది. అయితే ప్రపంచ దేశాలతో పోలిస్తే ఇప్పటికీ కరోనా మరణాల విషయంలో భారత్ అందరికంటే మెరుగ్గా ఉందని ఐసీఎంఆర్ తెలిపింది.
10 లక్షల మందిలో 50 వేల మందికి పరీక్షలు నిర్వహించే స్థాయికి టెస్టింగ్ సామర్థ్యం పెరిగినట్లు ఐసీఎంఆర్ స్పష్టం చేసింది. సెప్టెంబర్లో మొత్తం 2.97 కోట్ల పరీక్షలు నిర్వహించినట్లు వెల్లడించింది.
సెరో సర్వే విషయాలు...
- 10 ఏళ్లు దాటిన ప్రతి 15 మందిలో ఒకరు 2020 ఆగస్ట్ నాటికి కరోనాతో బాధపడుతున్నట్లు అంచనా.
- గ్రామీణ ప్రాంతాల (4.4%)తో పోలిస్తే అర్బన్ స్లమ్ (15.6%), అర్బన్ నాన్ స్లమ్ (8.2%) ప్రాంతాల్లో కొవిడ్ వ్యాప్తి అధికంగా ఉంది.
- ఆగస్ట్ 17 నుంచి సెప్టెంబర్ 22 వరకు 29,082 మందిపై సర్వే చేయగా అందులో 6.6 శాతం మంది అప్పటికే కరోనా బారిన పడ్డారు.
- గ్రామీణ ప్రాంతాలతో పోలిస్తే పట్టణ మురికివాడల్లో కరోనా వ్యాప్తి 4 రెట్లు అధికంగా ఉంది. నాన్ స్లమ్ ప్రాంతాలతో పోలిస్తే రెండు రెట్లు అధికం.
ఐదు 'టీ' లతో చెక్..
కరోనా బారి నుంచి రక్షించేందుకు 5'టీ'(టెస్ట్, ట్రేక్, ట్రేస్, ట్రీట్, టెక్నాలజీ) సూత్రాన్ని ఐసీఎమ్ఆర్ సూచించింది. వీటితో కరోనాను సమర్థంగా ఎదుర్కోవచ్చని విశ్వాసం వ్యక్తం చేసింది.
అయితే రాబోయే పండుగ కాలంలో వైరస్ మరింత వ్యాపించే ప్రమాదం ఉందని ఐసీఎంఆర్ హెచ్చరించింది. ప్రజలు గూమిగూడకుండా రాష్ట్రాలు మరింత శ్రద్ధగా కరోనా నియమాలు పాటించేలా చేయాలని సూచించింది.
