మహిళల రక్షణకు షీ టీమ్ల ఏర్పాటు తెలుగు రాష్ట్రాల్లో సుపరిచితమే. ఇలాంటి కార్యక్రమమే ఒడిశాలోని గజపతి జిల్లా ఎస్పీ సారా శర్మ ఏర్పాటు చేశారు. అంతే కాదండోయ్ షీ టీమ్లకు ప్రచారం కల్పించేందుకు ఓ పాట తయారు చేసి విడుదల చేశారు. ఈ గీతాన్ని స్వయంగా ఎస్పీ సారానే ఆలపించారు.
ఈ షీ టీమ్ గీతం మహిళల్లో ఆత్మ విశ్వాసాన్ని పెంచుతుందని, ధైర్యసాహసాలను నింపుతుందన్నారు ఎస్పీ సారా శర్మ. రాత్రుళ్లలో ఇంటికి తిరిగి వస్తున్నప్పుడు ఆకతాయిల ఆగడాలతో అభద్రతా భావం నెలకొందన్న యువతుల వినతితో ఈ నిర్ణయం తీసుకున్నట్లు వెల్లడించారు శర్మ. యువతులతో పలు దఫాలు చర్చించిన అనంతరం షీ టీమ్లకు రూపకల్పన చేశామని వివరించారు.
ఎస్పీ సారా శర్మ ఏర్పాటు చేసిన షీ టీమ్లో ఓ మహిళా ఎస్సై నేతృత్వంలోని పోలీసు సిబ్బంది జిల్లాలోని వీధుల్లో పెట్రోలింగ్ నిర్వహిస్తుంటారు. అమ్మాయిలను అల్లరి పెట్టే కేసులపై కఠినంగా వ్యవహరించనున్నారు. యువతుల నుంచి ఫిర్యాదుల స్వీకరణకు ఓ నెంబర్నూ ఏర్పాటు చేసి విస్తృత ప్రచారం కల్పిస్తున్నారు.
ఈ గజపతి జిల్లా షీ టీమ్ మరికొద్ది రోజుల్లో పూర్తిస్థాయి కార్యకలాపాలను నిర్వహించనుంది. ఈ నేపథ్యంలో సమాజంలో షీ టీమ్ పట్ల అవగాహన పెంచేందుకు చిహ్నాన్ని, గీతాన్ని విడుదల చేశారు.
ఇదీ చూడండి: వైరల్: అసలు చిరుత ఇలా ప్రవరిస్తుందా?
