సరిహద్దు విభేదాలు వివాదాలుగా మారకుండా భారత్-చైనా కృషి చేయాలని... భారత జాతీయ భద్రతా సలహాదారు (ఎన్ఎస్ఏ) అజిత్ డోభాల్, చైనా విదేశాంగ మంత్రి వాంగ్ యీ ఓ అంగీకారానికి వచ్చారు. ఆదివారం వీడియో కాన్ఫెరెన్స్ ద్వారా సమావేశమైన ఇరువురు నేతలు.. సరిహద్దుల్లో శాంతి స్థాపన కోసం ఈ చర్చలు కొనసాగించాలని నిర్ణయించారు.
"ఇరువురు నేతలు వాస్తవాధీన రేఖ వెంబడి శాంతి స్థాపన సహా సరిహద్దుల్లో శాశ్వత యథాపూర్వ స్థితి పునరుద్ధరణే లక్ష్యంగా చర్చలు జరిపారు. అలాగే భవిష్యత్లో గల్వాన్ ఘర్షణ లాంటి పరిస్థితులు తలెత్తకుండా ఇరుదేశాలు కలిసి పనిచేయాలని నిర్ణయించారు. ఇందుకోసం సరిహద్దుల నుంచి సైనిక బలగాలను దశలవారీగా.. పూర్తిగా ఉపసంహరించుకోవాలని ఇరువురు ఓ అంగీకారానికి వచ్చారు."
- అధికార వర్గాలు
భారత్-చైనా రెండూ వాస్తవాధీన రేఖను గౌరవించాలని... ఏ ఒక్కరూ వాస్తవాధీన రేఖ వెంబడి యథాపూర్వ స్థితిని మార్చే ప్రయత్నాలు చేయకూడదని అజిత్ ఢోబాల్- వాంగ్ యీ నిశ్చయించారు.
కొద్ది గంటల్లోనే చైనా రివర్స్ గేర్
డోభాల్-వాంగ్ యీ చర్చలు జరిపిన కొద్ది గంటలకే తూర్పు లద్దాఖ్ గల్వాన్ లోయ నుంచి ఇరుదేశాల సైనిక బలగాలు వెనక్కి తగ్గుతున్నాయన్న వార్తలు వచ్చాయి.
"వాస్తవాధీన రేఖ వెంబడి గల్వాన్ లోయ సెక్టార్లోని పెట్రోలింగ్ పాయింట్ 14, పీపీ-15, హాట్ స్పింగ్స్, ఫింగర్ ఏరియాల నుంచి (భారత్-చైనా) ఇరుదేశాల సైనిక బలగాలు వెనక్కు మళ్లాయి."
- భారత సైన్యం
చైనా తమకు చెందిన వాహనాలు, గుడారాలను 1 నుంచి 2 కి.మీ మేర వెనక్కి తరలించింది. అయితే గల్వాన్ లోయ వెంబడి ఇప్పటికీ చైనా సాయుధ వాహనాలు ఉన్నట్లు తెలుస్తోంది.
సరిహద్దు ఘర్షణ అనంతరం ఇరుదేశాల సైనిక కమాండర్ల మధ్య పలు దఫాలుగా చర్చలు జరిగాయి. అయితే జులై 1 చుషుల్లో జరిగిన మూడో సమావేశంలో కుదిరిన ఒప్పందం మేరకు... చైనా తన బలగాలను ఉపసంహరిస్తున్నట్లు స్పష్టమవుతోంది.
ఇదీ చూడండి: కశ్మీర్ సైనిక వ్యూహం ఈశాన్యంలో ఫలిస్తుందా?
