చైనాతో సరిహద్దు ఉద్రిక్తతలు నెలకొన్న వేళ.. ప్రధానమంత్రి నరేంద్ర మోదీ ప్రభుత్వం దేశ భద్రతకై నిత్యం అప్రమత్తంగా ఉంటోందని కేంద్రమంత్రి అమిత్ షా అన్నారు. దేశ భూభాగంలోని ఒక్క అంగుళం కూడా ఎవరు ఆక్రమించుకోలేరన్నారు.
భారత్- చైనా ప్రతిష్టంభనను పరిష్కరించేందుకు ప్రభుత్వం మిలిటరీ-దౌత్య స్థాయిలో అన్ని చర్యలు చేపడుతోందని స్పష్టం చేశారు షా.
"మన భూభాగంలోని ప్రతి అంగుళాన్ని కాపాడుకునేందుకు మేము అప్రమత్తంగా ఉన్నాం. ఎవరూ ఆక్రమించుకోలేరు. దేశ సార్వభౌమాధికారం, సరిహద్దును రక్షించుకునే శక్తి మన భద్రతా బలగాలకు, నాయకత్వానికి ఉంది."
--- అమిత్ షా, కేంద్ర హోంమంత్రి
'బంగాల్లో భాజపా జెండా..'
వచ్చే ఏడాది జరగనున్న బంగాల్ అసెంబ్లీ ఎన్నికల్లో భాజపా విజయం సాధించి.. ప్రభుత్వాన్ని ఏర్పాటు చేస్తుందని ధీమా వ్యక్తం చేశారు షా. ప్రస్తుతం ఆ రాష్ట్రంలో శాంతిభద్రతలకు ప్రభుత్వం తూట్లుపొడుస్తోందని.. ఫలితంగా అక్కడ రాష్ట్రపతి పాలనను విధించాలని డిమండ్ చేసే హక్కు భాజపా వంటి పార్టీలకు ఉందన్నారు.
హాథ్రస్ ఘటనపై స్పందించిన షా... విషయాన్ని రాజకీయం చేసిన విపక్షాలపై తీవ్రస్థాయిలో మండిపడ్డారు. ఘటన జరిగిన రోజే నిందితులను అరెస్టు చేశారని.. ప్రస్తుతం సీబీఐ దర్యాప్తు జరుగుతోందన్నారు.
ఇదీ చూడండి- బిహార్ తర్వాతి సీఎం ఆయనే: అమిత్షా
