దేశవ్యాప్తంగా కరోనా మహమ్మారి విజృంభిస్తున్నప్పటికీ .. హిమాచల్ ప్రదేశ్లో మాత్రం ఆ ప్రభావం తగ్గుముఖం పడుతోంది. గతమూడు రోజులుగా ఆ రాష్ట్రంలో ఒక్క కొవిడ్-19 పాజిటివ్ కేసు కూడా నమోదు కాకపోవడమే ఇందుకు నిదర్శనం. హిమాచల్ ప్రదేశ్లో ఇప్పటివరకు 41 మందికి వైరస్ సోకగా.. 22 మంది డిశ్చార్జ్ అయ్యారు. మరో 13 మంది బాధితులు చికిత్స పొందుతున్నట్లు ఆ రాష్ట్ర యంత్రాంగం తెలిపింది.
మహారాష్ట్ర, దిల్లీలో తీవ్రం
మరోవైపు మహారాష్ట్ర, దిల్లీలో కొవిడ్ విలయతాండవం కొనసాగుతూనే ఉంది. దేశంలో కరోనా కేంద్ర బిందువుగా మారిన మహారాష్ట్రలో ఇవాళ కొత్తగా 440 కరోనా కేసులు నమోదయ్యాయి. వీటితో కలిపి మొత్తం బాధితుల సంఖ్య 8,068కి పెరిగింది. వైరస్ బారినపడి మరో 19 మంది మృతిచెందగా.. మరణాల సంఖ్య 342 కు చేరింది. ఇప్పటివరకు మొత్తం 1,188 మంది డిశ్చార్జ్ అయ్యారు.
దిల్లీలోనూ ఇవాళ కొత్తగా 293 మందికి వైరస్ కేసులు బయటపడ్డాయి. దీంతో బాధితుల సంఖ్య 2,918 కు పెరిగింది. దేశరాజధానిలో ఇప్పటివరకు 54 మంది ఈ మహమ్మారి బారినపడి ప్రాణాలు కోల్పోయారు.
గుజరాత్లో ఒక్కరోజు వ్యవధిలో 230 మందికి వైరస్ సోకగా.. మొత్తం బాధితుల సంఖ్య 3,301కు ఎగబాకింది. రాష్ట్రంలో ఇప్పటివరకు వైరస్ ధాటికి 151 మంది ప్రాణాలు కోల్పోయారు. మరో 313 మంది డిశ్చార్జ్ అయ్యారు.
తమిళనాడులో వెయ్యి మంది డిశ్చార్జ్
తమిళనాడులో 24 గంటల వ్యవధిలో మరో 64 మంది కొవిడ్ బారినపడగా.. మొత్తం కేసుల సంఖ్య 1,885 కు చేరింది. అయితే రాష్ట్రంలో ఇప్పటివరకు సుమారు 1,020 మంది వైరస్పై పోరాడి డిశ్చార్జ్ అయ్యారు.
మధ్యప్రదేశ్లో వైరస్ బాధితుల సంఖ్య 2 వేలు దాటింది. ఈ రోజు నిర్వహించిన కొవిడ్-19 పరీక్షల్లో 145 మందికి పాజిటివ్గా తేలింది. దీంతో మొత్తం కేసుల సంఖ్య 2,090 కు చేరగా.. 103 మంది మరణించారు. రాష్ట్రంలో ఇండోర్ ప్రాంతంలో వైరస్ ప్రభావం అధికంగా కనిపిస్తోంది. రాష్ట్రంలోని మొత్తం కేసుల్లో 1,176 ఇండోర్లోనే నమోదయ్యాయి.
బిహార్లో మరో 19 మందికి కొవిడ్ పాజిటివ్గా నిర్ధరణ కాగా.. మొత్తం కేసుల సంఖ్య 274 కు చేరింది. అయితే 11 మంది ఈ మహమ్మారి బారి నుంచి పూర్తిగా కోలుకుని డిశ్చార్జ్ అయ్యారని రాష్ట్ర ఆరోగ్య శాఖ తెలిపింది.
ఝార్ఖండ్లో ఒక్కరోజులోనే అత్యధిక స్థాయిలో 15 కేసులు నమోదయ్యాయి. ఫలితంగా మొత్తం కేసుల సంఖ్య 82కు చేరింది.
ఇదీ చదవండి: 'కరోనాపై పోరులో ఓర్పు, క్రమశిక్షణే కీలకం'
