24 గంటల్లో 354 కేసులు.. 8 మరణాలు

దేశంలో గడిచిన 24 గంటల్లో 354 కరోనా కేసులు నమోదైనట్లు స్పష్టం చేసింది కేంద్ర ఆరోగ్య మంత్రిత్వ శాఖ. ప్రస్తుతం 3981 యాక్టివ్​ కేసులున్నట్లు స్పష్టం చేసింది. లాక్​డౌన్​ పొడిగింపుపై కేంద్రం ఇంకా ఎలాంటి నిర్ణయం తీసుకోలేదని.. ఆయా రాష్ట్రాల విజ్ఞప్తుల మేరకు దీనిపై ఆలోచన చేస్తున్నట్లు పేర్కొన్నారు ఆరోగ్య శాఖ సంయుక్త కార్యదర్శి లవ్​ అగర్వాల్​.

ఇప్పటివరకు దేశవ్యాప్తంగా కొవిడ్​ సోకిన 326 మంది డిశ్చార్జి అయినట్లు స్పష్టం చేసింది కేంద్ర ఆరోగ్య మంత్రిత్వ శాఖ. మొత్తం 4 వేల 421 కరోనా కేసులు నమోదుకాగా.. ప్రస్తుతం 3981 మంది ఆసుపత్రుల్లో చికిత్స తీసుకుంటున్నట్లు స్పష్టం చేశారు ఆరోగ్య శాఖ సంయుక్త కార్యదర్శి లవ్​ అగర్వాల్​. మరో 114 మరణాలు నమోదైనట్లు వెల్లడించారు. గత 24 గంటల్లోనే 354 కేసులు, 8 మరణాలు సంభవించినట్లు పేర్కొన్నారు.

కరోనా సమన్వయానికి నూతన విధానం తీసుకొచ్చినట్లు పేర్కొన్నారు అగర్వాల్​. చికిత్స కోసం ఆస్పత్రులను రెండు విధాలుగా విభజించామని తెలిపిన ఆయన.. కరోనా తీవ్రత, అత్యంత విషమంగా ఉన్న బాధితులకు వేర్వేరుగా చికిత్స అందించనున్నట్లు స్పష్టం చేశారు. కరోనా లక్షణాలున్న వారిని కొవిడ్​ కేర్​ సెంటర్లకు తరలిస్తున్నట్లు తెలిపారు. వైరస్​ ప్రభావం తీవ్రంగా ఉన్న బాధితులకు ప్రత్యేక ఆస్పత్రుల్లో చికిత్స చేయనున్నట్లు వెల్లడించారు. క్వారంటైన్​లో ఉన్నవారిని సాంకేతిక పరిజ్ఞానంతో పర్యవేక్షిస్తున్నట్లు వివరించారు.

ఒక్కరే 406 మందికి..

లాక్​డౌన్​, భౌతిక దూరం పాటించని.. ఒక కరోనా రోగి నుంచి 30 రోజుల్లోనే 406 మందికి కరోనా సోకే అవకాశం ఉందని భారత వైద్య పరిశోధన మండలి(ఐసీఎంఆర్)​ అధ్యయనంలో తేలింది.

లాక్​డౌన్​ పొడిగింపుపై..

దేశంలో లాక్​డౌన్​ పొడిగించాలని ఆయా రాష్ట్రాలు కోరుతున్నట్లు తెలిపిన లవ్​ అగర్వాల్​.. కేంద్రం దీనిపై ఆలోచన చేస్తున్నట్లు పేర్కొన్నారు. పొడిగింపుపై సామాజిక మాధ్యమాల్లో వచ్చే వార్తలను నమ్మొద్దని స్పష్టం చేశారు.

లక్షా 7 వేల మందికి పరీక్షలు..

దేశవ్యాప్తంగా ఇప్పటివరకు లక్షా 7 వేల ఆరుగురికి కరోనా పరీక్షలు నిర్వహించినట్లు స్పష్టం చేసింది ఐసీఎంఆర్​. ప్రస్తుతం 136 ప్రభుత్వ ల్యాబుల్లో చికిత్స అందిస్తున్నామని.. మరో 59 ప్రైవేటు ల్యాబ్​లకు అనుమతినిచ్చినట్లు వెల్లడించింది.