కొత్త రకం కరోనా స్ట్రెయిన్ వ్యాప్తి కారణంగా బ్రిటన్-భారత్ల మధ్య వందే భారత్ మిషన్ విమాన సేవలను తాత్కాలికంగా రద్దు చేస్తున్నట్లు విదేశీ వ్యవహారాల శాఖ వెల్లడించింది. డిసెంబర్ 1న 8వ విడత వందేభారత్ మిషన్ ప్రారంభమైందని, దీని ద్వారా 27 దేశాల నుంచి 1005 విమానాలు కార్యకలాపాలు నిర్వహించినట్లు ఆ శాఖ అధికార ప్రతినిధి అనురాగ్ శ్రీవాస్తవ పేర్కొన్నారు. ఈ ఒక్క విడతలో 1.8లక్షల మంది భారతీయులను స్వదేశానికి తరలించినట్లు వెల్లడించారు.
కరోనా సంక్షోభ సమయంలో విదేశాల్లో చిక్కుకున్న భారతీయులను స్వదేశానికి రప్పించేందుకు ఈ ఏడాది మే నుంచి వందే భారత్ విషన్ విమాన సేవలను ప్రారంభించింది కేంద్రం. డిసెంబర్ 22వరకు వరకు మొత్తం 8 విడతల్లో 40 లక్షల మంది భారతీయులను వివిధ దేశాల నుంచి స్వేదేశానికి తీసుకొచ్చింది.
అటల్ స్మారక ఉపన్యాసం
మాజీ ప్రధాని అటల్ బిహారీ వాజ్పేయీ 96 జయంతిని పురస్కరించుకొని డిసెంబర్ 25న 'విదేశాంగ విధానంపై వాజ్పేయీ స్మారక ఉపన్యాసం' కార్యక్రమాన్ని నిర్వహించనున్నట్లు శ్రీవాస్తవ తెలిపారు. భారత్-అమెరికా వాణిజ్య సమాఖ్య అధ్యక్షుడు నిశా బిశ్వాల్ ఈ కార్యక్రమంలో ప్రసంగించనున్నట్లు చెప్పారు.
రష్యాతో సమావేశం రద్దు..
కరోనా కారణంగా భారత్-రష్యా మధ్య ఈ ఏడాది వార్షిక సమావేశం నిర్వహించలేకపోయామని శ్రీవాస్తవ వెల్లడించారు. రెండు దేశాల పరస్పర అంగీకారం మేరకే ఈ నిర్ణయం తీసుకున్నట్లు తెలిపారు. సమావేశానికి కొత్త తేదీలు ఖరారైన వెంటనే తెలియజేస్తామన్నారు. ఈ విషయంపై ఇతర ఉహాగానాలను నమ్మవద్దని సూచించారు.
