హరియాణాకు రెండోసారి ముఖ్యమంత్రిగా బాధ్యతలు చేపట్టిన మనోహర్ లాల్ ఖట్టర్ 1954లో రోహ్తక్లోని బనియానీలో జన్మించారు. రోహ్తక్లోనే మెట్రిక్యులేషన్ పూర్తి చేశారు. దిల్లీ యూనివర్సిటీ నుంచి బ్యాచిలర్ డిగ్రీ అందుకున్నారు.
రాజకీయ జీవితం...
1977లో రాష్ట్రీయ స్వయంసేవక్ సంఘ్(ఆరెస్సెస్)లో చేరారు ఖట్టర్. మూడేళ్ల అనంతరం.. పూర్తి స్థాయి ప్రచారక్గా మారిన ఆయన.. అలాగే 14 సంతవత్సరాల పాటు కొనసాగారు. దానికి కట్టుబడి జీవితకాలం బ్రహ్మచారిగానే ఉన్నారు.
2000 నుంచి 2014 వరకు ఖట్టర్... హరియాణా భాజపా సంస్థాగత ప్రధాన కార్యదర్శిగా ఉన్నారు. 2014 లోక్సభ ఎన్నికల కోసం రాష్ట్ర భాజపా విభాగ ఎన్నికల ప్రచార కమిటీ ఛైర్మన్గా నియమితులయ్యారు. అనంతరం.. భాజపా జాతీయ కార్యనిర్వాహక కమిటీలో ఆయనకు స్థానం లభించింది.
తొలిసారి ఎమ్మెల్యేగా పోటీ.. విజయం...
2014 హరియాణా ఎన్నికల్లో కర్నాల్ నియోజకవర్గం నుంచి ఖట్టర్... ఎమ్మెల్యేగా గెలిచారు. ఖట్టర్ కర్నాల్ స్థానికుడు కాదని... ప్రత్యర్థులు ఎన్నికల ప్రచారంలో విమర్శించినా మోదీ అనుకూల పవనాల తాకిడికి కొట్టుకుపోయాయి. ఆయనకు విజయం కట్టబెట్టాయి.
హరియాణాలో తొలిసారిగా భాజపా ఆధిక్యంలో నిలిచింది. అధికారంలోకి వచ్చింది. ఖట్టర్ను ముఖ్యమంత్రి పదవికి ప్రతిపాదించింది అధిష్ఠానం. అలా... భాజపా తరఫున హరియాణా తొలి సీఎంగా ఖట్టర్ సేవలందించారు.
సొంత వాహనమూ లేదు...
ఇటీవల ఎన్నికల్లో కర్నాల్ అసెంబ్లీ స్థానానికి నామినేషన్ దాఖలు చేసిన సందర్భంలో తన ఆస్తుల వివరాలను పొందుపరిచారు. మొత్తం ఆస్తుల విలువ రూ. 1.27 కోట్లుగా పేర్కొన్న ఆయన... చేతిలో కేవలం 15 వేల రూపాయలే ఉన్నాయని తెలిపారు. సొంత వాహనం కూడా లేదంట.
ఇప్పుడు రెండో సారి సీఎంగా బాధ్యతలు చేపట్టిన ఆయన... మరో ఐదేళ్లు సేవలందించనున్నారు.
వివాదాలు...
మనోహర్లాల్ ఖట్టర్ కొన్ని సార్లు నోరు జారారు. ఓ సారి బహిరంగ సభలో స్వతంత్య్ర సమరయోధుడు మంగళ్పాండేపై అనుచిత వ్యాఖ్యలు చేశారు. ఆయన చేసిన తప్పుతో స్వాతంత్ర్యం 90 ఏళ్లు ఆలస్యమైందని అన్నారు.
మరోసారి రుణమాఫీ వంటి పథకాలతో రైతులు బద్దకస్తులుగా తయారవుతున్నారని వివాదాస్పద వ్యాఖ్యలు చేశారు.
జమ్ముకశ్మీర్కు కేంద్రం స్వయం ప్రతిపత్తి రద్దు చేసిన అనంతరం.. ఇక అక్కడి అమ్మాయిలను హరియాణా యువకులు పెళ్లి చేసుకోవచ్చని బహిరంగంగా ప్రసంగించి సోషల్ మీడియాలో వైరల్ అయ్యారు.
ఇదీ చూడండి: హరియాణా సీఎంగా రెండోసారి ఖట్టర్..నేడే ప్రమాణం
