కరోనాపై పోరులో వైద్యులు, నర్సులు నిత్యం తీవ్రంగా శ్రమిస్తున్నారు. వారితో పాటు పారిశుద్ధ్య కార్మికులు కూడా తమ వంతు సహాయం చేస్తున్నారు. వైరస్ బారిన పడి ప్రాణాలు కోల్పోతున్న వారి మృతదేహాలను సొంత వారే చూడటానికి భయపడుతున్నారు. అలాంటిది ఆ మృతదేహాలను ప్రభుత్వ నిబంధనల ప్రకారం ఖననం చేయటానికి ధైర్యంగా ముందుకొస్తున్నారు పారిశుద్ధ్య కార్మికులు. కానీ సమాజంలో వారికి ఏదో విధంగా అవమానం జరుగుతూనే ఉంది. ఇందుకు అసోంలోని బారక్ లోయలో జరిగిన ఘటనే ఉదాహరణ.
భయంతోనే...
అసోంలో ఇటీవలే తొలి కరోనా మరణం సంభవించింది. శుక్రవారం మృతదేహాన్ని ఖననం చేయడానికి కుటుంబ సభ్యులకు తొమ్మిది మంది పారిశుద్ధ్య కార్మికులు సహాయం చేశారు.
ఆ తర్వాత హైలకండిలో తాము నివాసం ఉండే నగపట్టి కాలనీకి బయలుదేరారు. కానీ కాలనీవాసులు ఈ 9 మందిని అడ్డుకున్నారు. వీరికీ కరోనా సోకి ఉంటుందన్న అనుమానం, భయంతో లోపలికీ అడుగుపెట్టనివ్వలేదు.
ఈ విషయం తెలుసుకున్న హైలకండి సర్కిల్ ఆఫీసర్ త్రిదిబ్ రాయ్.. పరిస్థితిని అదుపు చేశారు. పారిశుద్ధ్య కార్మికులు మృతదేహానికి ఖననం చేస్తున్నప్పుడు తాము ఉన్నామని.. అన్నీ నిబంధనల ప్రకారమే జరిగాయని స్థానికులకు వివరించారు. ప్రజల్లో భయాందోళనలు పోగొట్టడానికి తొమ్మిది మందికి పరీక్షలు నిర్వహించారు. చివరికి కాలనీలోకి అనుమతినిచ్చారు స్థానికులు.
ఇదీ చూడండి:- 'ముగ్గురు భార్యలు, 12 మంది పిల్లలను పోషించలేకపోతున్నా'
