ప్రధానమంత్రి నరేంద్రమోదీ విదేశీ పర్యటనల చిత్రాలను కలిపి ముద్రించిన 'మోదీ ఇండియా కాలింగ్-2021' అనే పుస్తకాన్ని ప్రవాస భారతీ దివాస్ సందర్భంగా దిల్లీ భాజపా అధ్యక్షుడు ఆదేశ్ గుప్తా విడుదల చేశారు. ఈ పుస్తకాన్ని దేశ రాజధానిలోని ప్రెస్క్లబ్ ఆఫ్ ఇండియాలో ఆవిష్కరించారు. ప్రధాని మోదీ ఏడు ఖండాల్లో చేసిన పర్యటనల నుంచి సేకరించిన ఫోటోలను ఇందులో పదిల పరిచినట్లు భాజపా సీనియర్ నాయకుడు విజయ్ జాలీ తెలిపారు. ఇందులోని ప్రధాని పర్యటనలు.. భారత్ను ఎంత శక్తిమంతమైన దేశంగా తీర్చిదిద్దాయో వివరిస్తాయన్నారు. మోదీని నిత్యం విమర్శించే కాంగ్రెస్ నేత రాహుల్ గాంధీకి, దిల్లీ సీఎం అరవింద్ కేజ్రీవాల్కు బహూకరిస్తానని అన్నారు.
మోదీ ప్రధానమంత్రి అయ్యాక భారతీయ విదేశాంగ విధానం స్వరూపాన్నే మార్చేశారని దిల్లీ భాజపా అధ్యక్షుడు ఆదేష్ గుప్తా తెలిపారు. ఈ పుస్తకాన్ని చదివితే పాఠకులకు ఆ విషయం భోదపడుతుందన్నారు. ఇలాంటి దాన్ని తీసుకువచ్చినందుకు గాను జాలీకి కృతజ్ఞతలు చెప్పారు.
ప్రవాస భారతీ దివాస్ను 2003లో అప్పటి ప్రధానమంత్రి అటల్ బిహారీ వాజ్పేయీ ప్రారభించారు. భారత ప్రభుత్వానికి, ప్రవాస భారతీయుల మధ్య సంబంధాలను బలోపేతం చేసే లక్ష్యంతో ఈ కార్యక్రమాన్ని చేపట్టారు. జాతిపిత మహాత్మా గాంధీ 1915లో దక్షణాఫ్రికానుంచి తిరిగి వచ్చిన సందర్భంగా ఈ కార్యక్రమాన్ని చేపట్టారు. కరోనా కారణంగా ఈ కార్యక్రమాన్ని అన్లైన్ వేదికగా నిర్వహిస్తున్నారు.
