ముల్లోకాల్లో మెరుపుదాడులు చేసే సత్తా కేవలం భాజపా ప్రభుత్వానికే ఉందన్నారు ప్రధానమంత్రి నరేంద్ర మోదీ. ఉత్తర్ప్రదేశ్లో భాజపా ఎన్నికల ప్రచారాన్ని ప్రారంభించారాయన. మేరట్లో జరిగిన బహిరంగసభలో పాల్గొన్న మోదీ... ఎన్డీఏ చేసిన అభివృద్ధిని ప్రజలకు చూపిస్తూనే, విపక్షాల వైఫల్యాలను ఎండగతానని చెప్పారు.
2014లోనూ మేరట్ నుంచే భాజపా ఎన్నికల ప్రచారాన్ని ప్రారంభించారు మోదీ.
దేశ ప్రజలు ఎవరిని గెలిపించాలో ఇప్పటికే నిర్ణయం తీసుకున్నారని మోదీ అభిప్రాయపడ్డారు. ఐదేళ్ల పాలనలో తాను చేసిన పనులకు లెక్కలు చెబుతానని, ప్రత్యర్థుల లెక్కలూ తేలుస్తానని వ్యాఖ్యానించారు. చౌకీదార్ ఎవరికీ అన్యాయం చేయడని అన్నారు.
కాంగ్రెస్ హామీ ఇచ్చిన కనీస ఆదాయ పథకాన్ని మోదీ తప్పుబట్టారు. కనీసం బ్యాంకు ఖాతాలు తెరవలేని వారు, ఇప్పుడు పేదలకు సొమ్ము ఎలా ఇవ్వగలరని ప్రశ్నించారు.
ఈ సార్వత్రిక ఎన్నికలు నిర్ణయాత్మక ప్రభుత్వానికి, సరైన నిర్ణయాలు తీసుకోలేకపోయిన వారికి మధ్య జరిగే పోటీ అని ప్రధాని వ్యాఖ్యానించారు.
"ఈరోజున ఒకవైపు దేశాభివృద్ధి ఉంది. మరోవైపు నీతి, నిజాయితీ లేని వారు కనపడుతున్నారు. ఒకవైపు సమర్థమైన నిర్ణయాలు తీసుకునే ప్రభుత్వం ఉంది. మరోవైపు దశాబ్దాలుగా సరైన నిర్ణయాలు తీసుకోవడంలో విఫలమైన వారున్నారు. ఒక వైపు బలమైన చౌకీదార్ ఉన్నాడు. మరోవైపు కళంకితుల కూటమి ఉంది."
-నరేంద్ర మోదీ, ప్రధాని
