32 ట్యాంకర్ల నుంచి ఒక్కసారిగా గ్యాస్ లీకైతే పరిస్థితులు ఎలా ఉంటాయో ఒక్కసారి ఊహించుకోండి. అలాంటి భయానక ఘటన మరొకటి ఉండదు. వేలాది మందికి విషాదాన్ని మిగిల్చిన మధ్యప్రదేశ్లోని భోపాల్ గ్యాస్ లీకేజీ లాంటి దుర్ఘటన పునరావృతమయ్యేదే. కానీ.. త్రుటిలో తప్పింది. కర్ణాటక నుంచి గూడ్సులోని 32 కంటైనర్లలో గ్యాస్ నింపుకొని వెళ్తుండగా లీకేజీ సమస్య తలెత్తింది. రెండు వేర్వేరు రైల్వే స్టేషన్లలో సిబ్బంది అప్రమత్తతతో పెను ప్రమాదమే తప్పింది.
వివరాల్లోకి వెళ్తే.. కర్ణాటకలోని థూపుర్ రైల్వే స్టేషన్ నుంచి ఎల్పీజీ ట్యాంకర్లను మధ్యప్రదేశ్ భోపాల్ సమీపంలోని బకానియా ఎలీపీజీ డిపోకు తరలిస్తోంది గూడ్సు రైలు. మొత్తం 32 ట్యాంకర్లు గ్యాస్తో నిండి ఉన్నాయి. ఒక్కో ట్యాంకర్లో దాదాపు 37.8 టన్నుల గ్యాస్ ఉంది.
శుక్రవారం సాయంత్రం 4.50 గంటలకు గూడ్సు.. మధ్యప్రదేశ్లోని ఖాండ్వా స్టేషన్ వద్ద ఆగింది. అదే సమయంలో ట్యాంకర్ నుంచి గ్యాస్ లీకవుతున్నట్లు.. ఓ గార్డు గుర్తించి అధికారుల్ని అప్రమత్తం చేశాడు. రైల్వే అధికారులు, టెక్నీషియన్లు అందరూ రాత్రి 8 గంటల లోగా చేరుకొన్నారు. విద్యుత్ సరఫరా నిలిపి వేయించిన రైల్వే అధికారులు.. ఎలాంటి ప్రమాదం తలెత్తకుండా పరిస్థితిని పూర్తిగా తమ నియంత్రణలోకి తెచ్చుకున్నారు. ముందు జాగ్రత్తగా.. దాదాపు బ్లాక్ అవుట్ పరిస్థితుల్ని సృష్టించి స్థానిక కలెక్టర్, ఎస్పీ, విపత్తు నిర్వహణ అధికారులకు సమాచారం అందించారు.
తీవ్రంగా శ్రమించిన అనంతరం.. రాత్రి ఒంటిగంట ప్రాంతంలో సమస్య పరిష్కారమైంది. అనంతరం.. రైలు అక్కడి నుంచి కదిలింది.
మళ్లీ భోపాల్లో...
అయితే.. అదే సమస్య తిరగబెట్టింది. శనివారం ఉదయం 11.30 గంటలకు గూడ్సు.. భోపాల్ రైల్వే స్టేషన్ వద్ద ఆగిన సమయంలో కంటైనర్ నుంచి గ్యాస్ లీకేజీని గుర్తించిన అధికారులు వెంటనే పరిష్కరించారు. ఒకవేళ.. ముందే గుర్తించకపోతే భారీ పేలుడు సంభవించి పెద్ద ప్రమాదం జరిగేదే. గూడ్సు చేరాల్సిన బకానియా ఆయిల్ కంపెనీ.. భోపాల్ స్టేషన్ నుంచి 30-40 కిలోమీటర్ల దూరంలో ఉంది.
