ఉత్తర్ప్రదేశ్ రాజధాని లఖ్నవూలో దారుణం జరిగింది. తన తల్లితో పాటు సోదరుడిని ఓ మైనర్ బాలిక కాల్చి చంపింది. బాలిక మానసిక ఆరోగ్యం సరిగా లేదని పోలీసులు వెల్లడించారు. తను శిక్షణ పొందిన షూటర్ అని తెలుస్తోంది.
మృతిచెందిన వారు రైల్వే ప్రజా సంబంధాల అధికారి రాజేశ్ దత్ భార్య మాలతి, కుమారుడు సర్వాదత్గా గుర్తించారు పోలీసులు.
"రాజేశ్ ఇంట్లో మాలతితో ఆమె కుమారుడు సర్వాదత్ మృతదేహాలు ఉన్నాయి. అక్కడే రాజేశ్ కూతురు కూడా ఉంది. ఇంట్లో పనిచేసే వ్యక్తికి ఆమెనే సమాచారం ఇవ్వగా.. అతను పోలీసులకు ఫోన్ చేశాడు. ఈ నేరం తనే చేసినట్లు బాలిక అంగీకరించింది. ఆమె శరీరంపై బ్లేడుతో కోసుకున్న గాయాలు ఉన్నాయి. బాలిక తీవ్ర నిరాశలో ఉన్నట్లు కనిపిస్తోంది. ఆమెను బాలిక సంరక్షణ కేంద్రానికి తరలిస్తాం."
- సుజిత్ పాండే, లఖ్నవూ పోలీస్ కమిషనర్
బాత్రూమ్లో అద్దంపై 'అర్హతలేని మనుషులు' అని రాసిందని దర్యాప్తు బృందం గుర్తించింది. అదే అద్దంపై మొదటి తూటా పేల్చిందని.. అనంతరం తన తల్లిని కాల్చిందని పోలీసులు తెలిపారు. ఆ తర్వాత తన సోదరుణ్ని కాల్చినట్లు వివరించారు.
ఎవరూ క్షేమంగా లేరు..
ఈ హత్యకు సంబంధించి వార్తలు రాగానే కాంగ్రెస్ ప్రధాన కార్యదర్శి ప్రియాంక గాంధీ.. యోగి ప్రభుత్వంపై విమర్శలు చేశారు. సీఎం అధికారిక నివాసానికి సమీపంలో ఈ ఘటన జరగటం ఆటవిక రాజ్యాన్ని గుర్తు చేస్తుందన్నారు. రాష్ట్రంలో ఎవరూ క్షేమంగా లేరని ఆవేదన వ్యక్తం చేశారు.
ఇదీ చూడండి: సముద్ర అంబులెన్సులు ప్రారంభించిన కేరళ
