మహారాష్ట్రలోని జలగావ్ జిల్లా భడ్లి బుద్రుక్ గ్రామంలో ఓ హిజ్రా గ్రామ పంచాయతీ సభ్యలుగా ఎన్నికయ్యారు. అంజలి అనే వ్యక్తి మహారాష్ట్ర గ్రామ పంచాయతీ ఎన్నికల్లో గెలుపొందిన తొలి హిజ్రాగా ఘనత సాధించారు. జనవరి 15న పోలింగ్ జరగ్గా.. సోమవారం ఫలితాలు వెలువడ్డాయి. ఈ సందర్భంగా 'ఈటీవీ భారత్'తో అంజలి తన అనుభవాలను పంచుకున్నారు.
"గ్రామస్థులు నాపై నమ్మకంతో ఎన్నుకున్నారు. వారికి నేను రుణపడి ఉంటా. ఇప్పుడు నా బాధ్యతలు పెరిగాయి. గ్రామాభివృద్ధికి నా వంతు కృషి చేస్తా. గ్రామస్థులకు కనీస వసతులు అందించడం సహా అంగన్వాడీలు, వైద్య సదుపాయాలను మెరుగు పరచడంపైనే ప్రధానంగా దృష్టి సారిస్తా."
-అంజలి, భడ్లి బుద్రుక్ గ్రామ పంచాయతీ సభ్యులు
మాకు ప్రేరణ..
అంజలి విజయం పట్ల తోటి హిజ్రాలు హర్షం వ్యక్తం చేస్తున్నారు. ఈ రోజును తాము మరిచిపోలేమని పేర్కొన్నారు. అంజలిని ప్రేరణగా తీసుకుని రానున్న స్థానిక సంస్థల ఎన్నికల్లో పోటీ చేస్తామని షాంబ్ పాటిల్ అన్నారు.
ముందు తిరస్కారం..
వార్డు నెంబర్.4 నుంచి పోటీ చేసేందుకు మొదట మహిళల జనరల్ కేటగిరీలో అంజలి నామినేషల్ దాఖలు చేశారు. అయితే ఆ దరఖాస్తును ఎన్నికల సంఘం తిరస్కరించింది. దీనిపై హైకోర్టులో పిటిషన్ వేయగా.. కోర్టు అంజలికి సానుకూలంగా తీర్పునిచ్చింది.
ఇదీ చదవండి : బైడెన్ బృందంలో ట్రాన్స్జెండర్కు చోటు
