ప్రపంచాన్ని మొత్తం కరోనా వైరస్ ఆవహించింది. దేశాలన్నీ లాక్డౌన్ గుప్పిట ఉన్నాయి. ఈ నేపథ్యంలో అత్యవసర పరిస్థితుల్లో బయటకు వెళ్లాలంటే మాస్క్ తప్పనిసరి అవుతోంది. కొవిడ్ను ఎదుర్కొనేందుకు మాస్కు ఓ ఆయుధంలా ఉపయోగపడటమే కాక.. లాక్డౌన్ వేళ ఉపాధి కోల్పోయిన కార్మికులకు జీవనాధారంగా మారింది.
కేరళలో సూక్ష్మ పరిశ్రమలకు నేతృత్వం వహిస్తున్న 300 మంది మహిళలు ఇప్పటివరకు 14.50 లక్షల మాస్కులను తయారు చేశారు. పేదరికాన్ని పారదోలడానికి కేరళ ప్రభుత్వం ప్రవేశపెట్టిన 'కుడుంబశ్రీ' పథకం కింద వీరు ఈ మాస్కులు రూపొందించారు. లేయర్ల సంఖ్యను బట్టి ఒక్కో మాస్కు రూ.10 నుంచి రూ.15 మధ్య విక్రయిస్తున్నారు. ఈ విక్రయాల ద్వారా రూ.2 కోట్ల టర్నోవర్ వచ్చే అవకాశం ఉన్నట్లు అంచనా వేస్తున్నారు. వివిధ ప్రభుత్వ శాఖలు సహా, పలు సంస్థల నుంచి పెద్ద ఎత్తున ఆర్డర్లు వస్తున్నట్లు నిర్వహకులు చెబుతున్నారు.
స్వచ్ఛందంగా
ఈ బృహత్తర కార్యక్రమంలో స్వచ్ఛంద సంస్థలూ తమ వంతు సహాయం చేస్తున్నాయి. దేశవ్యాప్తంగా పలు కార్యక్రమాలు చేపడుతున్నాయి. మహిళలకు చేయూతనిచ్చేలా 2018లో శిక్షణ కేంద్రం ఏర్పాటు చేసినట్లు 'సేవ్ ది చిల్డ్రన్' సంస్థ పేర్కొంది. వాటిలో శిక్షణ పొందిన మహిళలు ఇప్పుడు మాస్కులు తయారీ చేస్తున్నట్లు తెలిపింది.
"మహిళలందరూ ఈ కేంద్రాల్లో శిక్షణ పొందారు. వారి సహాయార్థం మెటీరియల్ అందించాం. ఇప్పుడు వారు మాస్కులు తయారు చేస్తున్నారు. ఈ శిక్షణ యూనిట్లు.. సంక్షోభ పరిస్థితుల్లో సమాజానికి సేవ చేయడమే కాకుండా పేదరికంలో ఉన్న మహిళలకు జీవనాధారం అందిస్తున్నాయి."
-అనిదిత్ రాయ్, సేవ్ ద చిల్ట్రన్ డైరెక్టర్ ప్రోగ్రామ్స్
బిహార్ రాష్ట్రంలోనూ ప్రభుత్వ సహకారంతో మహిళలు మాస్కుల తయారీ చేపడుతున్నారు. తూర్పు చంపారన్, గయా జిల్లాలో సేవ్ ద చిల్డ్రన్ భాగస్వామ్యంతో మాస్కులు రూపొందిస్తున్నారు. ఇక్కడ రెండు రోజుల్లోనే 3500 మాస్కులను తయారు చేసినట్లు ఆ సంస్థ ప్రతినిధులు తెలిపారు. గయాలో పలువురు బాలికలు కలిసి తయారు చేసిన బేసిక్ మాస్కులను స్థానికులకు పంచిపెట్టారు.
"తూర్పు చంపారన్ జిల్లాలో మా భాగస్వామ్య సంస్థలు కొవిడ్-19పై అవగాహన కల్పించడానికి ప్రభుత్వ అనుమతినిచ్చింది. లాక్డౌన్, భౌతిక దూరం పాటించడం ప్రాముఖ్యం సహా మాస్కులను సైతం మేము అందిస్తున్నాం. చిన్నారులతో పాటు సమాజాన్నంతటికీ ఈ వైరస్ పట్ల, వైరస్ నుంచి కాపాడుకోవడం పట్ల అవగాహన కల్పించడమే మా కార్యక్రమం ముఖ్య ఉద్దేశం. కొవిడ్-19 వ్యాప్తికి ఎదురయ్యే ముప్పు తీవ్రతను తగ్గించడం మా లక్ష్యం."
-అనిదిత్ రాయ్ చౌదరి, సేవ్ ద చిల్ట్రన్ డైరెక్టర్ ప్రోగ్రామ్స్
నిజమైన 'సేవ'
సేవ్ ద చిల్డ్రన్ భాగస్వామ్య సంస్థ అయిన 'సేవ' అసోంలోని దిబ్రూగడ్ జిల్లాలో మాస్కుల తయారీ చేపడుతోంది. జిల్లా యంత్రాంగం నుంచి వచ్చిన ఆదేశాల ఆర్డర్ల ప్రకారం వీటిని తయారు చేస్తోంది.
మధ్యప్రదేశ్లోని దమో జిల్లాలో 156 మంది మహిళలు కలిసి 50 వేల మాస్కులు ఉత్పత్తి చేశారు. ఇవన్నీ పంపిణీకి సిద్ధంగా ఉన్నట్లు జిల్లా అధికారులు స్పష్టం చేశారు. దీని ద్వారా స్థానిక ప్రజలకు వైరస్ నిరోధించే పరికరాలతో పాటు పేద మహిళలకు మంచి ఉపాది లభిస్తుంది. కరోనా వైరస్ ప్రాభల్యంతో దెబ్బతిన్న బలహీన వర్గాల జీవితాల్లో ఈ కార్యక్రమాలు చిన్ని చిన్ని వెలుగులను నింపుతున్నాయనడంలో ఎలాంటి సందేహం లేదు.
