మహిళను వేధిస్తున్నాడనే అనుమానంతో.. ఓ వ్యక్తిని బెంగళూరు పోలీసు అధికారి విచక్షణారహితంగా కొట్టారు. ఆ వ్యక్తి కాళ్లను తాడుతో కట్టి చితకబాదారు. ప్రస్తుతం ఈ వీడియో సామాజిక మాధ్యమాల్లో వైరల్గా మారింది.
ఇదీ జరిగింది...
యశ్వంత అనే వ్యక్తి బెంగళూరులోని ప్రపంచ వాణిజ్య సముదాయంలో సాంకేతిక నిపుణుడిగా పనిచేస్తున్నాడు. యశ్వంత తనపై వేధింపులకు పాల్పడుతున్నాడని ఓ మహిళ పోలీసులకు ఫిర్యాదు చేసింది. పోలీసులు అతడిని అదుపులోకి తీసుకున్నారు. సుబ్రమణ్య నగర్ పోలీస్ స్టేషన్లోని సబ్ ఇన్స్పెక్టర్.. యశ్వంతను విచక్షణారహితంగా కొట్టారు. హాకీ కర్ర విరిగేలా చితకబాదారు.
అక్కడే ఉన్న ఇతర సిబ్బందికి సబ్ ఇన్స్పెక్టర్ ప్రవర్తన నచ్చలేదు. ఆయన చర్యలను వ్యతిరేకిస్తూ... ఆ దృశ్యాలను చిత్రీకరించి సామాజిక మాధ్యమాల్లో అప్లోడ్ చేశారు. ఆ వీడియో వైరల్గా మారింది. సదరు పోలీస్ ప్రవర్తనపై సర్వత్రా విమర్శలు ఎదురవుతున్నాయి.
ఈ ఘటనపై దర్యాప్తునకు ఆదేశించినట్లు నార్త్ డివిజన్ డీజీపీ తెలిపారు. సంబంధిత అధికారి తప్పు చేసినట్లు తెలిస్తే తగిన చర్యలు తీసుకుంటామన్నారు.
ఇదీ చూడండి:- పచ్చని 'కప్ప'ల కాపురంలో విడాకుల చిచ్చు!
