'పశ్చిమ బంగ పేరు మార్పు ప్రక్రియ వేగం పెంచండి'

ప్రధానమంత్రి నరేంద్రమోదీకి లేఖ రాశారు పశ్చిమ బంగ ముఖ్యమంత్రి మమతా బెనర్జీ. రాష్ట్రం పేరును బంగ్లాగా మార్చే ప్రక్రియను వేగవంతం చేయాలని తన లేఖలో పేర్కొన్నారు. పేరుమార్పుపై కేంద్రం ఎలాంటి నిర్ణయం తీసుకోలేదని, ఈ ప్రక్రియకు రాజ్యాంగ సవరణ అవసరమౌతుందని రాజ్యసభలో కేంద్ర హోం శాఖ సహాయమంత్రి నిత్యానంద రాయ్ వెల్లడించిన నేపథ్యంలో లేఖ రాశారు దీదీ.

పశ్చిమ బంగ రాష్ట్రం పేరు 'బంగ్లా'గా మార్చే ప్రక్రియ వేగవంతం చేయాలని ప్రధానమంత్రి నరేంద్రమోదీకి లేఖ రాశారు ఆ రాష్ట్ర ముఖ్యమంత్రి మమతా బెనర్జీ. ఈ పార్లమెంట్ సమావేశాల్లోనే పేరు మార్పునకు అవసరమైన రాజ్యాంగ సవరణ చేపట్టాలని మోదీకి రాసిన లేఖలో పేర్కొన్నారు దీదీ.

పేరు మార్పుపై ప్రభుత్వం ఇంకా అంగీకరించలేదని, రాజ్యాంగ సవరణ అవసరమౌతుందని కేంద్ర హోంశాఖ సహాయ మంత్రి నిత్యానంద్​ రాయ్ రాజ్యసభలో ప్రకటించిన అనంతరం ఈ లేఖ రాశారు మమత.

ఆంగ్లంలో వెస్ట్​ బంగాల్​గా, బెంగాలీలో పశ్చిమ్ బంగగా తమ రాష్ట్రాన్ని వ్యవహరిస్తున్నారని, గొప్ప చరిత్ర కలిగిన తమ రాష్ట్రాన్ని ఈ విధమైన పేర్లు ప్రతిబింబించవని తన లేఖలో పేర్కొన్నారు దీదీ.

2017, సెప్టెంబర్ 8వ తేదిన బంగాల్ పేరును హిందీ, ఆంగ్లం, బెంగాలీ భాషల్లో బంగ్లాగా మార్చేందుకు రాష్ట్ర శాసనసభ అంగీకారం తెలిపింది. 2018, ఆగస్టు, 21న ఈ మేరకు తీర్మానాన్ని ఆమోదించింది.

పేరు మార్పు ప్రక్రియను వేగవంతం చేయాలని బంగాల్ ప్రభుత్వం తరఫున ఓ లేఖను సిద్ధం చేశారు. ఈ లేఖను గురువారం కేంద్రానికి పంపించనున్నారు.

ఇదీ చూడండి: 120 ఏళ్ల సంప్రదాయం.. పోస్ట్​ఉమెన్ పడవ ప్రయాణం