బిహార్ ఎన్డీఏలో అసమ్మతి అంతకంతకూ తీవ్రమవుతున్నట్లు కనిపిస్తోంది. కూటమిలో భాగస్వామిగా ఉన్న లోక్ జనశక్తి పార్టీ(ఎల్జేపీ) త్వరలో జరగబోయే అసెంబ్లీ ఎన్నికల్లో ఒంటరిగానే పోటీ చేయాలని నిశ్చయించుకున్నట్లు సమాచారం. బిహార్ సీఎం నితీశ్ కుమార్ నేతృత్వంలోని జేడీయూ పోటీ చేసే 143 స్థానాల్లో తమ అభ్యర్థులను బరిలోకి దింపాలని ఎల్జేపీ జాతీయ అధ్యక్షుడు చిరాగ్ పాసవాన్ భావిస్తున్నట్లు పార్టీ వర్గాలు తెలిపాయి.
అయితే జాతీయ స్థాయిలో మాత్రం ఎన్డీఏలోనే కొనసాగనుంది ఎల్జేపీ. రామ్విలాస్ పాసవాన్ కేంద్రమంత్రిగానే ఉండనున్నారు.
చిరాగ్ పోటీ!
ప్రస్తుతం లోక్సభ ఎంపీగా ఉన్న చిరాగ్ పాసవాన్ బిహార్ అసెంబ్లీ ఎన్నికల్లో పోటీ చేయనున్నారని సమాచారం. కేవలం జాతీయ స్థాయి రాజకీయాలకే పరిమితం కాకుండా రాష్ట్ర రాజకీయాలపై ఆయన దృష్టి సారించినట్లు పార్టీలోని సీనియర్ నేతలు తెలిపారు. బిహార్ ముఖ్యమంత్రి పీఠంపైనా ఆయన కన్నేసినట్లు పేర్కొన్నారు. ముఖ్యమంత్రి పదవికి చిరాగ్ అర్హుడని పార్టీ నాయకులు కూడా బహిరంగంగా ప్రకటించేందుకు సిద్ధంగా ఉన్నారని తెలుస్తోంది.
తొలుత బిహార్లో ఎన్డీఏలోనే కొనసాగాలని చిరాగ్ భావించారు. 'బిహార్ ఫస్ట్... బిహారీ ఫస్ట్' అనే అంశాన్ని ఎన్నికల మేనిఫెస్టోలో చేర్చాలని ఆయన కోరారు. అయితే మున్సిపల్ కౌన్సిల్ ఎన్నికల నామినేషన్ సమయంలో జేడీయూ, ఎల్జేపీ మధ్య విభేదాలు తలెత్తాయి. తమ పార్టీకి రెండు సీట్లు కేటాయించాలని చిరాగ్ కోరగా.. జేడీయూ అందుకు నిరాకరించింది.
