'మోదీని చంపేందుకు లాలూ క్షుద్ర పూజలు!'

తనను చంపేందుకు లాలూ ప్రసాద్​ యాదవ్​ మూడేళ్ల ముందు క్షుద్రపూజలు నిర్వహించారని ఆరోపించారు బిహార్​ ఉపముఖ్యమంత్రి సుశీల్​ మోదీ. ఆర్​జేడీ అధినేతకు క్షుద్రపూజలపై విశ్వాసం ఎక్కువ అని తెలిపారు. అయితే ఈ ఆరోపణలను ఆర్​జేడీ నేత తేజస్వీ యాదవ్​ ఖండించారు. ఇవి ఆసాధారణమైన వ్యాఖ్యలని.. ఇందులో నిజం లేదని తేల్చిచెప్పారు.

బిహార్​ ఎన్నికలు సమీపిస్తున్న తరుణంలో ఆ రాష్ట్ర ఉపముఖ్యమంత్రి సుశీల్​ కుమార్​ మోదీ సంచలన వ్యాఖ్యలు చేశారు. ఆర్​జేడీ(రాష్ట్రీయ జనతాదళ్​) అధినేత లాలూ ప్రసాద్​ యాదవ్​.. తనను హత్య చేసేందుకు మూడేళ్ల క్రితం క్షుద్రపూజలు నిర్వహించారని ఆరోపించారు. క్షుద్రపూజల మీద లాలూకు చాలా నమ్మకం ఉందని ట్వీట్​ చేశారు.

సుశీల్​ ట్వీట్లు

"లాలూకు మూఢనమ్మకాలు ఎక్కువ. తాంత్రికుడు చెప్పాడని తెల్ల కుర్తా వేసుకోవడమే మానేశారు. అంతేకాకుండా.. తాంత్రికుడైన శంకర్​ చరణ్​ త్రిపాఠీని తన పార్టీ జాతీయ ప్రతినిధిగా నియమించుకున్నారు. ఈ తాంత్రికుడు.. మీర్జాపుర్​లోని విద్యాంచల్​ ధామ్​ వద్ద లాలూ కోసం క్షుద్రపూజలు నిర్వహించేవారు. నన్ను చంపేందుకు మూడేళ్ల ముందు క్షుద్రపూజలు చేశారు."

-- సుశీల్​ మోదీ, బిహార్​ ఉపముఖ్యమంత్రి.

ప్రజలపై లాలూకు నమ్మకం లేదని.. అందుకే క్షుద్ర పూజలు, జంతు బలి, ఆత్మలకు ప్రార్థనలు చేసేవారని పేర్కొన్నారు సుశీల్​. అయినప్పటికీ.. ఇంతవరకు జైలు బయటకు రాలేకపోయారని ఎద్దేవా చేశారు.

ఇదీ చూడండి- బిహార్ బరి: 'నిరుద్యోగి'పైనే అందరి గురి

2005లో ఓటమి అనంతరం ముఖ్యమంత్రి నివాసాన్ని వీడేందుకు లాలూ నెలన్నర సమయం తీసుకున్నారని గుర్తుచేశారు ఉపముఖ్యమంత్రి. అయితే ఆ ఇంట్లో తాను చేతబడికి సంబంధించిన వస్తువులను దాచినట్టు.. ఇక ఆ నివాసంలో ఎవరు నిలబడలేరని లాలూ చేప్పినట్టు సుశీల్​ పేర్కొన్నారు. కానీ అదే ఇంట్లో ఉండి ముఖ్యమంత్రి నితీశ్​ కుమార్​ 15ఏళ్ల పాటు రాష్ట్రాన్ని అభివృద్ధివైపు నడిపించారని స్పష్టం చేశారు.

'ఆరోపణల్లో నిజం లేదు..'

సుశీల్​ మోదీ ఆరోపణలను ఖండించారు ఆర్​జేడీ నేత, లాలూ తనయుడు తేజస్వీ యాదవ్​. ఆయన ఆరోపణలు వింతగా, ఆసాధారణంగా ఉన్నాయని.. వాటిలో నిజం లేదని తేల్చిచెప్పారు. సుశీల్​ మోదీ వంటి వ్యక్తి ఇలాంటి వ్యాఖ్యలు చేస్తారని ఊహించలేదని పేర్కొన్నారు.

ఇదీ చూడండి:- '9న లాలూ రిలీజ్​- 10న నితీశ్​కు ఫేర్​వెల్​'