జమ్ముకశ్మీర్లోని కుప్వారా జిల్లా హంద్వారాలో 56 గంటలపాటు సాగిన సుదీర్ఘ ఎదురుకాల్పుల్లో ఇద్దరు ఉగ్రవాదులు మృతి చెందినట్లు పోలీసులు వెల్లడించారు. పరిసరాలు అనుకూలించక తీవ్రవాదుల్ని మట్టుబెట్టడం కష్టతరమయిందని భద్రతా సిబ్బంది పేర్కొంది. శుక్రవారం ఉదయం ప్రారంభమైన ఈ ఎదురుకాల్పుల్లో ఐదుగురు భద్రతా సిబ్బంది సహా ఒక సాధారణ పౌరుడు మృతి చెందారు.
తనిఖీలు చేస్తున్న పోలీసులపై కాల్పులు జరిపారు ఉగ్రవాదులు. చుట్టూ నివాస గృహాలు ఉండటం, ఉగ్రవాదులు నక్కిన ప్రాంతం ఇరుకుగా ఉన్న కారణంగా ఎన్కౌంటర్ ఆలస్యమైందని తెలిపారు పోలీసులు.
ఘటనా స్థలి నుంచి ఆయుధాలు, మందుగుండు సామగ్రిని స్వాధీనం చేసుకున్నారు. ఎదురుకాల్పులు జరుగుతున్న సమయంలో స్థానికుల్ని పోలీసులు సురక్షిత ప్రాంతాలకు పంపారు.
