కర్ణాటక మాజీ ముఖ్యమంత్రి, జేడీఎస్ నేత కుమారస్వామి మరోమారు కంటతడి పెట్టుకున్నారు. లోక్సభ ఎన్నికల్లో మండ్య ప్రజలు తన కుమారుడిని ఓడించడమే ఇందుకు కారణం. నమ్ముకున్న మండ్య ప్రజలు నిఖిల్ను ఓడించి తనను ఒంటరిని చేశారని ఆవేదన చెందారు.
కేఆర్పేట్ నియోజకవర్గం ఉప ఎన్నికల్లో పోటీ చేస్తోన్న జేడీఎస్ అభ్యర్థి బీఎస్ దేవరాజు తరఫున ప్రచారం చేపట్టారు స్వామి. ఈ సందర్భంగా ప్రసంగిస్తూ.. రాష్ట్ర ప్రజలకు తాను ఏమి తప్పు చేశానని ప్రశ్నించారు. పేదలకు సేవ చేసేందుకే రాజకీయాల్లో ఉన్నానని చెబుతూ కన్నీరుమున్నీరయ్యారు.
" నాకు రాజకీయాలు, ముఖ్యమంత్రి పదవి అవసరం లేదు. మీ ప్రేమానురాగులు మాత్రమే కావాలి. నా కుమారుడు ఎలా ఓటమి చెందాడో నాకు తెలియదు. మండ్య బరిలో నిలపాలని అనుకోలేదు.. కానీ అక్కడి ప్రజల కోరిక మేరకే పోటీ చేయించా. కానీ నా కుమారుడికి మద్దతు ఇవ్వలేదు.. అదే నన్ను బాధకు గురిచేసింది. మండ్య ప్రజలు నన్ను ఒంటరివాడిని చేశారు. "
- కుమారస్వామి, కర్ణాటక మాజీ ముఖ్యమంత్రి.
ఇదీ చూడండి: 'శ్రీలంకకూ చైనా భయం- దిల్లీ వైఖరే కీలకం'
