అంతర్జాతీయ న్యాయస్థానం(ఐసీజే)లో భారత్ గొప్ప విజయం సాధించింది. రహస్య గూఢచర్యం ఆరోపణలతో పాకిస్థాన్ చెరలో ఉన్న భారత నావికాదళ విశ్రాంత అధికారి కుల్భూషణ్ జాదవ్ కేసులో భారత్కు అనుకూలంగా తీర్పు వచ్చింది. కుల్భూషణ్కు పాక్ మిలిటరీ కోర్టు విధించిన మరణ శిక్షను నిలిపివేస్తూ ఆదేశాలు జారీ చేసింది ఐసీజే. ఈకేసును పునఃసమీక్ష చేయాలని స్పష్టం చేసింది. న్యాయవాదిని నియమించుకునే సౌకర్యం కుల్భూషణ్కు కల్పించాలని పాక్కు సూచించింది ఐసీజే.
తీర్పు సందర్భంగా పాక్ తీరును న్యాయస్ధానం తీవ్రంగా తప్పుపట్టింది. జాదవ్‌తో మాట్లాడడం సహా అతన్ని కలుసుకునేందుకు భారత్కు ఉన్న హక్కులను హరించడం ద్వారా పాక్..... వియన్నా ఒప్పందాన్ని ఉల్లంఘించిందని తెలిపింది. కుల్భూషణ్ జాదవ్ అరెస్టు విషయంపై భారత్కు పాక్ సమాచారం ఇవ్వలేదని మండిపడింది.
భారత్ దాఖలు చేసిన పిటిషన్‌ను అంగీకరిస్తూ ఐసీజే తీసుకున్న నిర్ణయంపై పాక్ అభ్యంతరాలను న్యాయస్ధానం తోసిపుచ్చింది. భారత్ పిటిషన్‌ను విచారణకు స్వీకరించవచ్చని స్పష్టం చేసింది. జాదవ్ భారత పౌరుడు కాదని సందేహించడానికి ఎలాంటి ఆస్కారం లేదని న్యాయస్ధానం తెలిపింది. 16 మంది న్యాయమూర్తుల్లో చైనా న్యాయమూర్తి సహా భారత్కు అనుకూలంగా 15 మంది రూలింగ్‌ ఇచ్చారు. భారత్ దాఖలు చేసిన పిటిషన్‌పై ఐసీజే ఈ ఏడాది ఫిబ్రవరి 21న విచారణను పూర్తి చేసింది.
