ఓ అందమైన యువతి, ప్రమాదవశాత్తు దివ్యాంగుడైన ఓ యువకుడిని ప్రేమించింది. వద్దని వారించిన పెద్దలను ఎదిరించి, చివరికి ఒప్పించి మరీ అతనిని పెళ్లి చేసుకుంది. ఏంటీ సినిమా కథ అనుకుంటున్నారా? కానేకాదు ఇది నమ్మశక్యం కాని ఓ యథార్థగాథ.
కేరళ త్రిశూర్ జిల్లాలోని తాజెకాడ్కు చెందిన యువకుడు ప్రణవ్. ఆరేళ్ల క్రితం విద్యార్థిగా ఉన్నప్పుడు బైక్ ప్రమాదానికి గురయ్యాడు. ప్రాణమైతే నిలిచింది కానీ తుంటి కింద భాగం మొత్తం చచ్చుబడిపోయి చక్రాల కుర్చీకే పరిమితమైపోయాడు. ప్రాథమిక అవసరాల కోసం కూడా ఇతరులపై ఆధారపడాల్సిన పరిస్థితికి చేరుకున్నాడు.
ఆత్మవిశ్వాసం
తన పరిస్థితిని చూసుకొని ప్రణవ్ ఏ మాత్రం నిరుత్సాహపడలేదు. ఆత్మవిశ్వాసం కోల్పోయి... నాలుగు గోడలకే పరిమితం కావాలనుకోలేదు. ఆలయాల్లో జరిగే ఉత్సవాలకు తరచుగా వెళుతుండేవాడు. చక్రాల కుర్చీలోనే కూర్చొని పండుగలను ఆస్వాదిస్తుండేవాడు. ఆ వీడియోలు సామాజిక మాధ్యమ వేదిక ఫేస్బుక్లో విపరీతంగా వైరల్ అయ్యాయి.
అదే సమయంలో తిరువనంతపురానికి చెందిన షహానా... అనుకోకుండా ఓ రోజు ప్రణవ్ వీడియోలను చూసింది. ఫేస్బుక్లోని ప్రణవ్ ఫోన్ నంబర్ తీసుకొని అతనితో మాట్లాడటం మొదలుపెట్టింది. అలా కొన్ని రోజులు గడిచిన తరువాత ప్రణవ్కు తన ప్రేమను వ్యక్తపరిచిన షహానా.. పెళ్లి ప్రతిపాదన చేసింది.
ప్రేమ ఉన్నా...
ప్రణవ్ కూడా షహానాను ఇష్టపడినప్పటికీ, తన పరిస్థితిని దృష్టిలో ఉంచుకొని వివాహానికి ఒప్పుకోలేదు. అయితే షహానా పట్టు వీడలేదు. చివరికి వారిద్దరూ ఒకటి కావాలని నిర్ణయించుకున్నారు.
ఈ ప్రేమ వ్యవహారం తెలుసుకొని షహానా కుటుంబం ఒకింత ఆశ్చర్యపోయింది. ఫేస్బుక్లో తప్ప స్వయంగా ఎప్పుడూ చూడని ఓ దివ్యాంగుడిని వివాహం చేసుకోవద్దని వారించింది. అయితే.. తన ప్రేమను వదులుకోవడానికి ఇష్టపడని షహానా.. ప్రణవ్ కోసం ఇళ్లు విడిచి వచ్చేసింది. షహానా చేసిన పనితో ప్రణవ్ కుటుంబం కూడా ఇబ్బంది పడినా ఇరువురూ భౌతికంగా కలిసి ఉండేందుకు ఒప్పుకున్నారు. ఆమె వాస్తవికతను అర్థం చేసుకొని.. తిరిగి ఇంటికి వెళ్లిపోతుందని వారు ఆశించారు.
ప్రేమకు రూపంతో పనిలేదు
ప్రణవ్ను కళ్లారా చూసిన షహానా అతనినే పెళ్లి చేసుకుంటానని కచ్చితంగా చెప్పేసింది. ప్రేమకు భౌతిక రూపంతో పనిలేదని తేల్చిచెప్పేసింది. దీనితో కొడుంగల్లూర్లోని ఓ ఆలయంలో మార్చి 3న ఈ ప్రేమ జంట పెళ్లి చేసుకుని ఒక్కటైంది.
ఇదీ చూడండి: వృద్ధి రేటు భయాలతో రూపాయి భారీ పతనం
