కర్ణాటకలో ఏర్పడిన రాజకీయ సంక్షోభం కారణంగా కాంగ్రెస్- జేడీఎస్ సంకీర్ణ ప్రభుత్వం తీవ్ర ఇబ్బందులు ఎదుర్కొంటోంది. ఇలాంటి రాజకీయ సెగ తన ప్రభుత్వానికి తగలకుండా ముందే జాగ్రత్త పడుతున్నారు మధ్యప్రదేశ్ ముఖ్యమంత్రి కమల్నాథ్.
మధ్యప్రదేశ్లో 7 నెలల క్రితం కాంగ్రెస్ ప్రభుత్వాన్ని ఏర్పాటుచేసింది. స్వల్ప మెజారిటీతో ముఖ్యమంత్రి కమల్నాథ్ ప్రభుత్వాన్ని నడిపిస్తున్నారు. భాజపా నుంచి ఎలాంటి ప్రమాదం లేకుండా తన రాజకీయ చతురతతో ప్రభుత్వాన్ని నెట్టుకొస్తున్నారు.
బీజేపీ ఎత్తులు చిత్తు చేయాలి..
మధ్యప్రదేశ్లో జులై 8 నుంచి శాసనసభ వర్షాకాల సమావేశాలు జరుగుతున్నాయి. 19 రోజుల పాటు జరిగే ఈ సమావేశాల్లో...... ఆర్థిక బిల్లుల విషయంలో భాజపా డివిజన్ తీసుకువచ్చి... ఓటింగ్ పెట్టమని డిమాండ్ చేయవచ్చు. ఇందులో నెగ్గుకురావాలంటే అసెంబ్లీలో ప్రభుత్వానికి సంఖ్యాబలం తప్పనిసరి. లేకపోతే ప్రభుత్వం కుప్పకూలుతుంది.
అందువల్ల కాంగ్రెస్ ఎమ్మెల్యేలు, అలాగే తనకు మద్దతుగా నిలిచిన బీఎస్పీ, ఎస్పీ, స్వతంత్ర ఎమ్మెల్యేలు రాజధాని విడిచిపోకూడదని కమల్నాథ్ స్పష్టం చేశారు.
బహుజన్ సమాజ్ పార్టీ (బీఎస్పీ)... మంగళవారం కాంగ్రెస్ ప్రభుత్వానికి తన మద్దతును పునరుద్ధరించింది. ఇది కమల్నాథ్ ప్రభుత్వానికి శుభవార్త.
నీచ రాజకీయాలు..!
సంఖ్యాబలం లేకున్నా భాజపా నీచ రాజకీయాలకు పాల్పడుతోందని కాంగ్రెస్ నేత, రాష్ట్ర ఆర్థికమంత్రి తరుణ్ భానోత్ ఆరోపించారు. అయితే భాజపా పాచికలు పారవన్నారు.
మధ్యప్రదేశ్లో కాంగ్రెస్, మిత్రపక్షాలు ఐక్యంగా ఉన్నందున భాజపా ఏమీ చేయలేదని భానోత్ అన్నారు.
భాజపా ఎత్తులు
కాంగ్రెస్ ప్రభుత్వాన్ని ఇబ్బంది పెట్టడానికి భాజపా కూడా వ్యూహాలు రచిస్తోంది. అసెంబ్లీ సమావేశాల్లో భాజపా ఎమ్మెల్యేలు అందరూ తప్పక హాజరు కావాలని ప్రతిపక్షనేత గోపాల్ భార్గవ, భాజపా చీఫ్ రాకేశ్ సింగ్ సూచించారు.
లోక్సభ ఎన్నికల్లో మధ్యప్రదేశ్లోని 29 స్థానాల్లో భాజపా 28 సీట్లు గెలుచుకుంది. ఈ నేపథ్యంలో భాజపా నేత గోపాల్ భార్గవ మే నెలలో గవర్నర్ ఆనందీబెన్కు ఓ లేఖ రాశారు. అసెంబ్లీ ప్రత్యేక సమావేశాలు నిర్వహించి ఫ్లోర్ టెస్ట్ చేయాలని కోరారు.
ఆర్థిక బిల్లుల విషయంలో డివిజన్ పెట్టి ఓటింగ్ నిర్వహించాలని భాజపా భావిస్తోంది. అప్పుడు కాంగ్రెస్ నేతృత్వంలోని ప్రభుత్వానికి శాసనసభలో ఎంత బలముందో తేలిపోతుందని గోపాల్ భార్గవ అభిప్రాయపడ్డారు. ఆర్థిక బిల్లులను నెగ్గించుకోవడంలో విఫలమైతే... ప్రభుత్వం కూలుతుందని గోపాల్ భార్గవ స్పష్టం చేశారు.
ఇదీ విషయం..
2018 మధ్యప్రదేశ్ అసెంబ్లీ ఎన్నికల్లో 230 స్థానాలకుగాను కాంగ్రెస్ 114 సీట్లు గెలుచుకుంది. మేజిక్ నెంబర్ 116కు కేవలం 2 స్థానాల దూరంలో నిలిచిపోయింది. అయితే బీఎస్పీ నుంచి ఇద్దరు, సమాజ్వాదీ పార్టీ (ఎస్పీ) నుంచి ఒకరు, నలుగురు స్వతంత్రులు.... కమల్నాథ్ ప్రభుత్వానికి మద్దతుగా నిలిచారు.
109 ఎమ్మెల్యే సీట్లు గెలుచుకున్న భాజపా... 15 ఏళ్ల తరువాత మధ్యప్రదేశ్లో అధికారాన్ని కోల్పోయింది.
ఇదీ చూడండి: భారత్పై అమెరికా అధ్యక్షుడు ట్రంప్ గుస్సా
