ఎన్నికల వ్యూహకర్త, పార్టీ ఉపాధ్యక్షుడు ప్రశాంత్ కిశోర్, ప్రధాన కార్యదర్శి పవన్ వర్మపై బహిష్కరణ వేటు వేసింది బిహార్ అధికార పక్షం జేడీయూ. క్రమశిక్షణ తప్పి, పార్టీ నిర్ణయాలకు విరుద్ధంగా వ్యవహరించినందుకే ఈ చర్యలు తీసుకున్నట్లు స్పష్టంచేసింది.
పౌరసత్వ చట్ట సవరణ, జాతీయ పౌర పట్టిక విషయంలో బిహార్ ముఖ్యమంత్రి నితీశ్ కుమార్తో విభేదిస్తూ ప్రశాంత్, పవన్ ఇటీవల వివాదాస్పద వ్యాఖ్యలు చేసిన నేపథ్యంలో వారిని పార్టీ నుంచి బహిష్కరించింది జేడీయూ.
అసలేం జరిగింది?
ప్రశాంత్ కిశోర్ 2018 సెప్టెంబర్లో జేడీయూలో చేరారు. నితీశ్ కుమార్ ఆయనను జాతీయ ఉపాధ్యక్షుడిగా నియమించారు. అయితే జేడీయూ మిత్రపక్షమైన భాజపాపై ప్రశాంత్ కిశోర్ కొంతకాలంగా విమర్శలు గుప్పిస్తున్నారు. పౌరసత్వ సవరణ బిల్లు విషయంలో ఆ పార్టీని సమర్థించాలన్న జేడీయూ నిర్ణయాన్ని కిశోర్ తప్పుబడుతున్నారు.
ఈ ఏడాది చివర్లో జరిగే అసెంబ్లీ ఎన్నికల్లో భాజపా కన్నా ఎక్కువ సీట్లలో తమ పార్టీ పోటీ చేయాలన్నారు. దీనికితోడు దిల్లీలో ఆమ్ఆద్మీ పార్టీ కోసం ఆయన పనిచేస్తున్నారు. అక్కడ ఎన్డీఏ పక్షాలు ఆప్తో తలపడుతున్నాయి.
పవన్ వర్మ సైతం ఇదే తరహాలో జేడీయూ అధిష్ఠానంతో విభేదిస్తున్నారు.
