కేంద్రం తీసుకొచ్చిన కొత్త వ్యవసాయ చట్టాలపై బహిరంగ చర్చకు సిద్ధం అన్నారు కేంద్ర మంత్రి ప్రకాశ్ జావడేకర్. కాంగ్రెస్ నేత రాహుల్ గాంధీ, ద్రవిడ మున్నేట్ర కళగం (డీఎంకే) చర్చకు రావాలని సవాలు చేశారు. దిల్లీలో రైతులు చేస్తోన్న ఆందోళనలకు మద్దతుగా ఈ గురువారం 'సత్యాగ్రహం' పేరుతో నిరసనలు తెలపాలని రాహుల్ పిలుపునిచ్చిన నేపథ్యంలో మంత్రి ఈ వ్యాఖ్యలు చేశారు.
"కేంద్రం తీసుకొచ్చిన సాగు చట్టాలను వెనక్కి తీసుకోవాలని రాహుల్ గాంధీ అంటున్నారు. రాహుల్కు, ద్రవిడ మున్నేట్ర కళగం పార్టీకు నేను ఓ సవాలు విసురుతున్నాను. బహిరంగా చర్చకు మేము సిద్ధం. మీరు రండి. రైతులకు చట్టాలు ఏ విధంగా మేలు చేస్తాయో వివరిస్తాం. అనవసర ఆరోపణలు వద్దు."
-ప్రకాశ్ జావడేకర్, కేంద్ర మంత్రి
