పూర్తిగా భద్రతా బలగాల నీడలోకి వెళ్లిన కశ్మీర్లో మంగళవారం జన జీవనం స్తంభించింది. అత్యవసర పనులు ఉన్నవారు మినహా మిగతావారంతా బిక్కుబిక్కుమంటూ ఇళ్లకే పరిమితమయ్యారు. విద్యాసంస్థలు తెరుచుకోలేదు. పలు ప్రాంతాల్లో అంతర్జాలం, మొబైల్ సేవలు నిలిచిపోవడం వల్ల బాహ్య ప్రపంచంతో వారికి సంబంధాలు తెగిపోయాయి.
కశ్మీరీల ఆందోళన
బయటి రాష్ట్రాల్లో స్థిరపడిన కశ్మీరీలు, లోయలో తమవారి పరిస్థితి ఎలా ఉందో తెలియక ట్విట్టర్ వేదికగా ఆందోళన వ్యక్తం చేశారు. కుటుంబ సభ్యులతో మాట్లాడలేకపోతున్నామంటూ ఆవేదన వ్యక్తం చేశారు. వారి క్షేమ సమాచారం కోసం ఎంతో ఆత్రుతగా ఎదురుచూస్తున్నట్టు తెలిపారు. అంతర్జాలం, కమ్యూనికేషన్ సేవలు నిలిచిపోవడం వల్ల అక్కడ రాతి యుగం వంటి పరిస్థితులు నెలకొన్నాయని పేర్కొన్నారు.
గవర్నర్తో డోభాల్ భేటీ
జాతీయ భద్రతా సలహాదారు అజిత్ డోభాల్ మంగళవారం జమ్ముకశ్మీర్ గవర్నర్ సత్యపాల్ మాలిక్తో భేటీ అయ్యారు. ఈ సందర్భంగా రాష్ట్రంలో భద్రతా పరిస్థితులపై చర్చించారు. ఎలాంటి పరిణామాలనైనా ఎదుర్కోవడానికి అన్ని విభాగాలు సిద్ధంగా ఉండాలని ఇద్దరూ అభిప్రాయపడ్డారు. వివిధ శాఖల మధ్య సమన్వయం ఉండాలన్నారు. రాష్ట్రంలో అప్రమత్తత, నిరంతర నిఘా కొనసాగాలని పేర్కొన్నారు.
ఇదీ చూడండి: 370 రద్దుతో కశ్మీర్లో వచ్చే మార్పులివే...
