ప్రాణాధార వ్యవస్థపై జైట్లీ... పరిస్థితి విషమం

కేంద్ర మాజీ మంత్రి అరుణ్​జైట్లీ ఆరోగ్య పరిస్థితి మరింత విషమించింది. ప్రాణాధార వ్యవస్థపై ఉంచి వైద్యులు ఆయనకు చికిత్స అందిస్తున్నారు. రక్షణమంత్రి రాజ్​నాథ్​సింగ్ సహా పలువురు కేంద్రమంత్రులు, ముఖ్య నేతలు ఎయిమ్స్​కు చేరుకుని ఆయన ఆరోగ్య పరిస్థితిపై ఆరా తీశారు.

దిల్లీ ఎయిమ్స్​ ఆసుపత్రిలో చికిత్స పొందుతున్న కేంద్ర మాజీ మంత్రి అరుణ్​జైట్లీ ఆరోగ్య పరిస్థితి మరింత విషమించింది. ప్రస్తుతం ఆయన్ను ప్రాణాధార వ్యవస్థపై ఉంచి చికిత్స అందిస్తున్నారు.

వైద్యుల బృందం ఇప్పటికే అరుణ్​జైట్లీకి డయాలసిస్ చికిత్స ప్రారంభించింది. ఆదివారం సాయంత్రం ఆయనను ఎక్స్​ట్రాకార్పోరియల్​ మెంబ్రేన్ అక్సిజనేషన్ (ఈసీఎంవో) వ్యవస్థపై ఉంచింది. ఇది గుండె, శ్వాస వ్యవస్థలకు తోడ్పాటు అందిస్తుంది.

శ్వాస సంబంధిత ఇబ్బందులతో బాధపడుతున్న అరుణ్​జైట్లీని కుటుంబ సభ్యులు ఈ నెల 9న ఎయిమ్స్​లో చేర్పించారు. అయితే ఆయన ఆరోగ్యానికి సంబంధించి 10వ తేదీ నుంచి ఎయిమ్స్...​ ఎలాంటి ప్రకటన విడుదల చేయలేదు.

ఆరోగ్య పరిస్థితిపై నేతల వాకబు..

రక్షణమంత్రి రాజ్​నాథ్​సింగ్​ సహా కేంద్రమంత్రులు స్మృతి ఇరానీ, జితేందర్​సింగ్​, హర్షవర్థన్ తదితరులు ఆదివారం ఎయిమ్స్​కు వచ్చి అరుణ్​జైట్లీ ఆరోగ్య పరిస్థితిపై వాకబు చేశారు. దిల్లీ ముఖ్యమంత్రి అరవింద్ కేజ్రీవాల్, ఆర్​ఎస్​ఎస్​ సర్​సంఘ్​చాలక్​ మోహన్​ భగవత్​ తదితరులూ జైట్లీ ఆరోగ్య పరిస్థితిని అడిగి తెలిసుకున్నారు.

ఇంతకు ముందు రాష్ట్రపతి రామ్​నాథ్​ కోవింద్, కేంద్ర హోంమంత్రి అమిత్​షా జైట్లీని పరామర్శించారు. భూటాన్​ పర్యటన నుంచి తిరిగివచ్చిన ప్రధాని మోదీ... ఎయిమ్స్​కు వెళ్లే అవకాశం ఉందని ప్రభుత్వ వర్గాలు వెల్లడించాయి.

బాధ్యతలు వద్దు

మోదీ 1.0 ప్రభుత్వంలో ఆర్థికమంత్రిగా ఉన్న జైట్లీ క్యాన్సర్ బారినపడ్డారు. ఆ సమయంలో ఆయన అమెరికా వెళ్లి చికిత్స తీసుకున్నారు. తిరిగి భారత్​కు వచ్చి చికిత్సను కొనసాగిస్తున్న జైట్లీ.. మోదీ 2.0 ప్రభుత్వంలో బాధ్యతలు తీసుకునేందుకు నిరాకరించారు.

ఇదీ చూడండి: ఉత్తరాది రాష్ట్రాలను వణికిస్తున్న భారీ వరదలు