జమ్ముకశ్మీర్‌ను కేంద్రపాలిత ప్రాంతాలుగా విభజించిన తర్వాత.. ఉగ్రవాద ముఠాల్లో చేరుతున్న కశ్మీరీ యువత సంఖ్య తగ్గిపోయినట్లు అధికారిక గణాంకాలు స్పష్టం చేస్తున్నాయి. 2019 ఆగస్టు 5 నుంచి 2020 జనవరి 26 వరకు జమ్ముకశ్మీర్ నుంచి కేవలం 28 మంది యువత మాత్రమే ఉగ్రవాద ముఠాలతో చేతులు కలిపినట్లు భద్రతా విభాగం.. ఓ అంతర్గత నివేదికలో పేర్కొంది.
గతేడాది జనవరి నుంచి ఆగస్టు వరకు ఉగ్రవాదం వైపు అడుగులు వేసిన యువత సంఖ్య కంటే ఇది 60 శాతం తక్కువ. ఆ సమయంలో ఎక్కువగా పుల్వామా, అనంత్‌నాగ్, కుల్‌గావ్‌, షోపియాన్‌ జిల్లాలకు చెందిన 105 మంది యువత ఉగ్రవాద గ్రూపులతో చేతులు కలిపారు. 2018తో పోలిస్తే... 2019లో ఆ సంఖ్య 35 శాతం తగ్గినట్లు భద్రతా విభాగం గణాంకాలు స్పష్టం చేస్తున్నాయి.
చొరబాట్లు ఆందోళనకరంగానే...
మరోవైపు భారత్‌లోకి చొరబడేందుకు పాకిస్థాన్ ఉగ్రవాదులు చేస్తున్న ప్రయత్నాలు మాత్రం తగ్గలేదు. గతేడాది 211 మంది ఉగ్రవాదులు జమ్ముకశ్మీర్‌లోకి చొచ్చుకువచ్చే ప్రయత్నాలు చేశారు. వారిలో 74 మంది పీఓకేలోకి తిరిగి వెళ్లిపోగా.. నలుగురిని సైన్యం మట్టుబెట్టినట్లు భద్రతా విభాగం నివేదికలో పేర్కొంది
